- वि.सं २०८१ बैशाख ८ शनिबार
सरकारले कोरोना भाइरस संक्रमण नियन्त्रणका लागि गरेकाे लकडाउनले व्यावसायिक गतिविधिसहित सवारीसाधनको सञ्चालन बन्द रहेको छ ।
यस्तै सवारीसाधनको सेवा दिँदै आएको टुटल र पठाओ लकडाउनले पूर्णतया प्रभावित बनेका छन् । जसका कारण कम्पनी नै बन्द हुने अवस्थामा रहेको टुटल र पठाओका सञ्चालकहरूले जनाएका छन् ।
कोरोना भाइरसको संक्रमण बढ्दै जाँदा तत्काल सवारीसाधन सञ्चालन हुने अवस्था नरहेकाले अब कम्पनी निकै कठिन मोडबाट गुज्रिरहेको पठाओका कम्पनी व्यवस्थापक शशांक थापाले बताए ।
उनले उत्पन्न कठिन अवस्थाका कारण कम्पनी नै बन्द गर्नुपर्ने अवस्था आउन लागेको जनाए ।
कोरोना भाइरस संक्रमितको संख्या दिन प्रतिदिन बढ्दो अवस्थामा रहेको र तत्काल अवस्था सामान्य बन्ने संकेत नदेखिएकाले सेवा सुरु हुने सम्भावना कम रहेको उनले बताए ।
साथै उनले कोरोनापछि उत्पन्न अवस्थाले कर्मचारीलाई तलबदेखि कम्पनीको खर्च कसरी व्यवस्थापन गर्ने भन्ने विषयले अन्योल उत्पन्न गराएको बताए ।
थापाका अनुसार अहिलेको अवस्था अझै लम्बिँदै गएमा कर्मचारीको तलबसमेत व्यवस्थापन गर्न नसक्ने अवस्थामा कम्पनी पुग्छ ।
पठाओको ५० हजार राइडरहरू यतिवेला घरमा बस्न बाध्य भएको कम्पनीको दाबी छ । उनीहरूको रोजीरोटी गुम्दा आफूहरूमाथि दबाब आइरहेको थापाले बताए ।
सवारीसाधनधनीलाई कोराेनाकै कारणले किस्तादेखि घरखर्च चलाउन समस्या भएको कम्पनीसमक्ष गुनासो आउने गरेको छ ।
‘राइडर साथीहरू हामीसमक्ष गुनासो पोख्नुहुन्छ अब के गर्ने भनेर, तर अहिले हामी कम्पनी नै धराशायी हुने अवस्थाबाट गुज्रिएका छौँ,’ थापाले भने ।
यसअघि पटकपटक गम्भीर मोडकाे सामना गर्दै आएको भए पनि अहिलेको जस्तो जटिल अवस्था पहिला नआएको टुटल कम्पनीका व्यवस्थापक तथा निर्देशक शिक्षित भट्टले बताए ।
यतिवेला टुटल पनि पठाओकै हालतमा कम्पनी नै बन्द गर्नुपर्ने अवस्थानजिक आइपुगेको उनी बताउँछन् ।
३० देखि ३५ हजारको संख्यामा टुटलमा आबद्ध राइडरहरू अहिले घर बस्न बाध्य भएको भट्टले बताए ।
‘कर, कार्यालयकाे भाडा, कर्मचारीलाई मासिक तलब दिँदा कम्पनी अब जिरोमा झरेको छ, हामीजस्ता साना कम्पनीको आफ्नै पीडा छ, कसले सुनिदिन्छ, न त हाम्रो संघसंस्था छ न त हाम्रो सम्बन्धित निकाय छ, हामी निकै मारमा परेका छौँ,’ भट्टले भने ।
सरकारले यातायात व्यवसायीको दबाबमा टुटल र पठाओलाई रोक्नका लागि पटकपटक प्रयास गरेको थियो । तर, सार्वजनिक रूपमा त्यसको तीव्र विरोध भएपछि सरकार पछि हटेको थियो ।
पछिल्लो समय भौतिक पूर्वाधार तया यातायातमन्त्री वसन्त नेम्वाङको पहलमा ढुक्कले चल्न पाएका टुटल र पठाओ यतिवेला कोरोनाको ठूलो मारमा आफ्नो बजारहिस्सा गुमाउन बाध्य भएका छन् ।
सरकारले कानुनी दायरामा ल्याएर सञ्चालन गर्ने भनिएका यस्तो व्यवसाय सञ्चालनका लागि प्रदेश सरकारले कानुन बनाएको भए पनि राजपत्रमा प्रकाशित हुन नसक्दा कानुनी रूपमा अझै अन्योलमा छन् ।
सर्वसाधारणले भने आफ्नो गन्तव्यमा जान यस्ता टुटल र पठाओसँग आबद्ध सवारीसाधनलाई सस्तो र छरितो मान्दै आएका छन् ।
