कोरोना रोकथामका लागि सेना परिचालन गरिएकाेमा कांग्रेस सांसदको आपत्ति
नेपाली कांग्रेसका सांसद अमरेशकुमार सिंहले विपत् व्यवस्थापनको काम गृह मन्त्रालयले निर्धारण गर्ने भए पनि सरकारले सेना परिचालन गरेकोप्रति असन्तुष्टि व्यक्त गरेका छन् ।
प्रतिनिधिसभाको बैठकमा सोमबार शून्य समयमा बोल्दै सांसद सिंहले नेपाली सेनामार्फत जनतालाई दबाएर लोकतन्त्र कमजोर बनाउन खोजिएको आरोप लगाए ।
कोरोनाले भयावह रूप लिएको विश्वका अन्य मुलुकहरूले कोरोना नियन्त्रणका लागि सेना परिचालन नगरेको उल्लेख गर्दै उनले नेपालको सन्दर्भमा उचित हुन्छ कि हुँदैन भन्ने कुराको छलफल हुनुपर्ने बताए ।
त्यसैगरी शून्य समयमा अर्का सांसद अतहर कमाल मुसलमानले लिम्पियाधुरा, लिपुलेक र कालापानीसमेतको नक्सा जारी गरेपछि सरकारले भूमिमाथिको स्वामित्व ग्रहण गर्नुपर्ने बताए । नक्सा मात्रै जारी गरेर नहुने उल्लेख गर्दै उनले दार्चुला–तिंकर सडकको ८७ किलोमिटर ट्रयाक खोल्ने काम अझै हुन नसकेको उल्लेख गरे ।
सांसद अमृता थापाले सरकारले विदेशबाट नेपाली नागरिक ल्याउन गरेको निर्णयको स्वागत गरिन् । अहिले नेपालमा कोरोना महामारी नियन्त्रण र संक्रमण न्यूनीकरणका लागि पर्याप्त तयारी नभएको उल्लेख गर्दै नेपाली जनतालाई भोक र रोग दुवैबाट बचाउने परिमार्जित योजना ल्याउनुपर्ने उनको माग थियो ।
सांसद उमाकान्त चौधरीले तराई क्षेत्रमा निर्माण भएका क्वारेन्टाइनहरू विश्व स्वास्थ्य संगठनको मापदण्डविपरीत रहेको उल्लेख गर्दै संक्रमणको दर बढेको बताए । क्वारेन्टाइन व्यवस्थापन तथा राहत, उद्धार र परीक्षणमा सरकारलाई ध्यान दिन उनले आग्रह गरे ।
सांसद गौरीशंकर चौधरीले लकडाउनको कारण आत्महत्याको घटना बढिरहेकोप्रति सरकारको ध्यानाकर्षण गराए । अझै विदेशबाट आउनेहरूको व्यवस्थापन गर्न सक्ने अवस्था नभएर आपराधिक घटनाहरू बढ्न सक्ने उनको भनाइ थियो ।