अहिलेसम्म कोरोनामुक्त रहेको संखुवासभाका दुईजनामा संक्रमण पुष्टि भएको छ ।

भारतबाट आएर तुम्लिङटारस्थित क्वारेन्टाइनमा रहेका दुईजनामा कोरोना संक्रमण पुष्टि भएको स्वास्थ्य कार्यालय खाँदबारीका प्रवक्ता रोशन श्रेष्ठले जानकारी दिए । उनका अनुसार गत बिहीबार भारतको सुनौली नाका हुँदै सातजनाको समूहमा आएका खाँदबारी नगरपालिका– ७ का २३ वर्षीय पुरुष र पाँचखपन नगरपालिका–१ का २२ वर्षीय पुरुषमा कोरोना पुष्टि भएको हो ।

संक्रमित दुवैलाई आइसोलेसनमा राखेर उपचार गराउन धरानस्थित बिपी कोइराला स्वास्थ्य विज्ञान प्रतिष्ठान पठाउने तयारी भइरहेको स्वास्थ्य कार्यालय खाँदबारीले जनाएको छ । जिल्लाका १० स्थानीय तहले एक सय ८२ बेडको क्वारेन्टाइन निर्माण गरेका छन् ।

अहिले ती क्वारेन्टाइनमा ३० जना महिला र एक सय चारजना पुरुष बसिरहेका छन् । त्यस्तै, पाँचजना महिला र १४ जना पुरुष होम क्वारेन्टाइनमा छन् । अहिलेसम्म जिल्लाका चार महिला र २४ पुरुषको पिसिआर रिपोर्ट नेगेटिभ आएको छ ।