- वि.सं २०८१ बैशाख ७ शुक्रबार
वीरगन्जको नारायणी अस्पतालबाट एकैपटक ४३ जना कोरोना संक्रमित निको भएर सोमबार घर फर्किएका छन् । अस्पतालमा भर्ना भएदेखि दुईपटक स्वाब परीक्षणको रिपोर्ट नेगेटिभ आएपछि उनीहरूलाई डिस्चार्ज गरिएको नारायणी अस्पतालका डा. उदयनारायण सिंहले जानकारी दिए ।
डा. सिंहले आइसोलेसनमा आएदेखि सबै संक्रमितको पछिल्ला दुई रिपोर्ट नेगेटिभ आएपछि डिस्चार्ज गरिएको बताए । सोमबार डिस्चार्ज हुने सूचीमा दुईजना वीरगन्जका पत्रकार पनि छन्। डिस्चार्ज हुने ४३ जनामा सर्लाहीका एकजना र पर्साका ४२ जना रहेका छन् । जसमा पर्साको वीरगन्ज, धोबिनी गाउँपालिका र छिपहरमाई गाउँपालिकाका रहेका छन्।
अब पर्सामा गण्डक अस्थायी कोभिड विशेष अस्पतालमा २७ जना मात्र संक्रमित रहेका छन् । यसअघि आइतबार राति ११ बजे वीरगन्ज-३ छपकैयाका एकै परिवारका १८ जना डिस्चार्ज भएका थिए ।
कोरोना भाइरसको संक्रमणलाई जितेर नारायणी अस्पतालबाट मात्रै दुई दिनमा ६१ जना डिस्चार्ज भएका छन् । यसरी एकैपटक ठूलो संख्यामा विरामी डिस्चार्ज हुँदा स्थानीय हर्षित भएका छन् ।
