आइतबार दिनभर बेलहिया नाका व्यस्त रह्यो । नेपाली सुरक्षा निकाय भारतबाट फर्केका आफ्ना नागरिक ल्याउन र भारतीय सुरक्षाकर्मी आफ्ना नागरिक लैजान सक्रिय रहे । तर, आउने–जाने कसैको पनि स्वास्थ्य परीक्षण भने गरिएन । जिल्ला प्रहरी कार्यालय रुपन्देहीका डिएसपी खड्कबहादुर खत्रीका अनुसार आइतबार हजारभन्दा बढी नेपाली आएका छन् । त्यस्तै, नेपालमा रहेका ६ सयभन्दा बढी भारतीय फर्किएका छन् । ‘आउने क्रम अझै रोकिएको छैन,’ उनले भने । सिमानामा सेनिटाइज गरेर मात्र स्वदेश भित्र्याएको उनले बताए । 

इलाका प्रहरी कार्यालय बेलहियाका अनुसार वैशाख मसान्तदेखि आइतबार साँझसम्म यो नाकाबाट करिब चार हजार सात सयभन्दा बढी नेपाली स्वदेश फर्किएका छन् । फर्किने क्रम बढेको छ । अहिले दैनिक हजारको हाराहारीमा फर्किरहेको प्रहरीले जनाएको छ । स्थानीय प्रशासनले सम्बन्धित जिल्ला प्रशासन र स्थानीय निकायसँग समन्वय गरेर उनीहरूलाई जिल्ला पठाउने गरेको छ ।