सत्तारुढ दल नेकपाको सचिवालय बैठकमा एमसिसीको विषयमा छलफल भएको छ । पार्टी प्रवक्ता नारायणकाजी श्रेष्ठका अनुसार बैठक अनौपचारिक भएकाले कुनै ठोस निर्णय भने भएन ।
उनका अनुसार बैठकमा प्रधानमन्त्री एवं नेकपा अध्यक्ष केपी शर्मा ओली भने अनुपस्थित थिए । प्रवक्ता श्रेष्ठका अनुसार बैठकमा सरोकारवालाले आ–आफ्नो प्रस्तुति राखेका थिए ।
बैठकमा एमसिसी अध्ययन कार्यदलका संयोजक र सदस्यहरू तथा अर्थमन्त्री, ऊर्जामन्त्री, विद्युत् प्राधिकरणका एमडी र एमसिसी नेपालका सिइओले एमसिसीबारे आ–आफ्नो ब्रिफिङ राखेका थिए ।
यसैगरी एमसिसीलाई पार्टीभित्र प्रश्न उठाउने नेताहरू देव गुरुङ र लीलामणि पोखरेलले पनि बैठकमा आफ्ना कुरा राखेका थिए ।
गत माघमा बनेको झलनाथ खनाल नेतृत्वको कार्यदलले एमसिसी यथास्थितिमा पास गर्न नहुने सुझाब दिएको थियो । तीन सदस्यीय कार्यदलमा संयोजक झलनाथ खनाल र सदस्य भीम रावलले यथास्थितिमा पास गर्न नहुने सुझाब दिए पनि परराष्ट्रयमन्त्रीसमेत रहेका कार्यदल सदस्य प्रदीप ज्ञवालीले भने १५बुँदे फरक मत राखेका थिए ।
केही समययता थाती रहेको एमसिसी मुद्दा नेकपामा फेरि उठेको छ । पछिल्लो संसदमा आएको नीति तथा कार्यक्रमको २११ नं. बुँदामा लप्सिफेदी–रातमाटे–हेटौँडा, लप्सिफेदी–रातमाटे–दमौली–बुटवलको ट्रान्समिसन लाइन बनाउने विषय छ । यसलाई नेकपामा केही नेताले एमसिसीकै योजनामा आएको बताएपछि थप विवाद भएको थियो ।