हेटौँडा उपमहानगरपालिका कार्यालयले लकडाउन अवधिमै नियमित खोप कार्यक्रम सुचारु गरेको छ ।
उपमहानगरपालिकाले कोरोना प्रभाव र लकडाउनका कारण एक महिना अघिदेखि रोकेको नियमित खोप कार्यक्रम बिहीबारदेखि पुनः सुचारु गरेको हो ।
उपमहानगरपालिकामा सुचारु गरिएको कार्यक्रमअन्तर्गत सुरुमा हेटौँडा १ र ४ मा डिपिटी, पिसिभी र एफआइभिपी खोप लगाएको छ ।
लकडाउनका कारण एक महिना अघिदेखि रोकिएको नियमित लगाउनुपर्ने डिपिटी, पिसिभी र एफआइभिपी खोप सुचारु गरिएको उपमहानगरपालिका प्रमुख हरिबहादुर महतले जानकारी दिए ।
उनले बिहीबार हेटौँडा– १ का ३५ जना बालबालिकालाई डिपिटी र हेटौँडा– ४ का २९ जनालाई पिसिभी र एफआइभिपी खोप लगाइएको जानकारी दिए ।
उनले उपमहानगरपालिकाबाट खोप कार्यक्रममा खटिएका स्वास्थ्यकर्मीका लागि आवश्यक स्वास्थ्य सामग्री उपलब्ध गराइएको र सुरक्षित तवरले कार्यक्रम सुचारु गरिएको दाबी गरे ।
कोरोना प्रभाव र लकडाउनका कारण उपमहानगर क्षेत्रका बालबालिकाका लागि अनिवार्य आवश्यक खोप रोकिँदा अर्को समस्या उत्पन्न हुने भएकाले नियमित कार्यक्रम सुचारु गरिएको उनको भनाइ छ ।
यसलाई निरन्तरता दिने उनले जानकारी दिए ।