Skip This
सेयर बजारमा परिसूचक नेप्से दुई प्रतिशतले घटेपछि बुधबार पनि नेगेटिभ सर्किट लागेर कारोबार बन्द भएको छ ।
कारोबार सुरु भएदेखि नै निरन्तर ओरालो लागेको नेप्से परिसूचक ४० मिनेट नपुग्दै २ प्रतिशतले घटेर बन्द भएको हो ।
नेपाल धितोपत्र बोर्डले लकडाउनको वेलामा दिनको दुई घन्टा बजार खोल्न सक्ने र नेप्सेमा दुई प्रतिशतको उतारचढाव भए एक दिनका लागि कारोबार बन्द गर्ने व्यवस्था गरेको छ ।
सोही व्यवस्थाअनुसार बुधबार पनि बन्द हुने समयअघि नै नेगेटिभ सर्किट लागेर कारोबार बन्द भएको हो ।
नेप्से परिसूचक २ प्रतिशत अर्थात् २४ दशमलव ५८ अंकले घटेर १ हजार २ सय १ दशमलव ५७ अंकमा बन्द भएको छ ।
सेन्सेटिभ परिसूचक पनि २ दशमलव शून्य एक प्रतिशतले घटेको छ ।
यस्तै, ७४ वटा कम्पनीको २ सय ११ कारोबारबाट ३६ लाख १३ हजार ५ सय २३ रुपैयाँबराबरको १० हजार ५ सय २६ कित्ता सेयर खरिद–बिक्री भएको छ ।
कारोबारमा आएका ११ वटै समूहका सूचकहरू घटेका छन् ।
यस्तै, कारोबार भएका सबै कम्पनीको सेयर मूल्य पनि घटेको छ ।
