नीति तथा कार्यक्रम दिगो विकासका लक्ष्य हासिल गर्नेतर्फ केन्द्रित हुन सरकारलाई विकास समितिको निर्देशन
राष्ट्रिय सभाको दिगो विकास समितिले सरकारका नीति तथा कार्यक्रम दिगो विकासका लक्ष्य हासिल गर्नेतर्फ केन्द्रित गर्न सरकारलाई सुझाब दिएको छ ।
शुक्रबार विज्ञ र सांसदहरूसँगको छलफलपछि समितिले दिगो विकासको निर्धारित लक्ष हासिल हुने गरी नीति तथा कार्यक्रम तय गर्न सुझाब दिएको हो । समिति सभापति तारादेवी भट्टले जलवायु परिवर्तन र कोभिड–१९ विश्वकै मुद्दा भएकाले नेपालले अब नयाँ ढंगले विकासलाई सोच्नुपर्ने वेला भएको बताइन्।
दिगो विकासका निर्धारित लक्ष्यहरू जलवायु परिवर्तनमा पर्न सक्ने जोखिम न्यूनीकरणका लागि प्रतिबद्ध रहे पनि त्यसका लागि चालिएका कदम र प्रयासहरू प्रभावकारी हुन नसक्दा विश्वले कोरोना महामारीको सामना गरिरहेको उनकाे भनाइ छ । विज्ञहरूले भविष्यमा कोरोनाभन्दा पनि बढी भयानक अवस्थाको सामना गर्ने चेतावनी दिइरहेका वेला त्यसतर्फ सोच्नुपर्ने वेला आएको उनले बताइन् ।
सभापति भट्टले सरकारका नीति तथा कार्यक्रमलाई दिगो विकास लक्ष्य हासिल गर्दै थप क्रियाशील बनाउनतर्फ शुक्रबारको छलफल केन्द्रित भएको बताइन् ।
वातावरणविज्ञ सिलशिला आचार्यले डिजेट, पेट्रोल र ठूला होटेलहरूको विकल्पमा सोच्न सकेमा मात्रै पनि वातावरण संरक्षण गर्न सकिने बताए । नेपालको सन्दर्भमा जलविद्युतलाई प्रवर्द्धन गरी डिजेल तथा पेट्रोलको प्रयोग घटाउने र ठूला होटेलहरूको सट्टा होम स्टेहरूको प्रवर्द्धन गर्नुपर्नेमा उनले जोड दिए ।
सांसद भैरवबहादुर श्रेष्ठले वनहरूको वैकल्पिक व्यवस्थापनका नाममा ठूलो मात्रामा वन फँडानी भइरहेको बताए । सांसद विमला राई पौडेलले जैविक मल र जैविक विषादी बनाउने उद्योग सञ्चालनतर्फ ध्यान दिन सके मात्रै प्रांगारिक कृषिलाई प्रवर्द्धन गर्न सकिने बताइन् ।