नेकपाका सांसदद्वारा संसदमा प्रस्तुत हुने एजेन्डा दुई अध्यक्षले तय गर्ने
शुक्रबारबाट सुरु हुने संसद्को बजेट अधिवेशनमा नेपाल कम्युनिस्ट पार्टी(नेकपा) का सांंसदहरू कसरी प्रस्तुत हुने भन्ने एजेन्डा दुई अध्यक्षद्वय केपी शर्मा ओली र पुष्पकमल दाहाल प्रचण्डले तय गर्ने सहमति भएको छ ।
संसदमा कसरी प्रस्तुत हुने भन्नेबारे दुई अध्यक्षले सांसदहरूलाई पत्र दिनेछन् ।
यसबारे प्रधानमन्त्री ओली, अध्यक्ष प्रचण्ड, महासचिव विष्णु पौडेल, नेताहरू सुवासचन्द्र नेम्वाङ, खिमलाल भट्टराई, देव गुरुङ, दीनानाथ शर्मा, शान्ता चौधरीलगायत बसेर टुंग्याएको स्रोतले जनाएको छ ।
साथै दुवै अध्यक्षले नीति तथा कार्यक्रमबारे प्रदेशगत रूपमा सांसदहरूसँग छलफल गर्ने र उनीहरूको सुझाब लिने तयारी भएको राष्ट्रिय सभाका नेकपाका प्रमुख सचेतक खिमलाल भट्टराईले जानकारी दिए ।
त्यसका लागि संसदीय दलको बैठक नै प्रदेशगत रूपमा सञ्चालन गर्ने सहमति भएको छ ।
यी सबै बैठक सामाजिक दूरी कायम हुने गरी व्यवस्थापन गरिनेछ ।