आँप टिप्ने क्रममा रूखबाट लडेर बालकको मृत्यु, नहरको डिलमा युवाको शव भेटियो
मोरङमा आँपको रूखबाट लडेर एक बालकको मृत्यु भएको छ ।
विराटनगर– १७ मटेरुवाका एक बालकको बुधबार साँझ आँप टिप्न रूख चढ्ने क्रममा लड्दा मृत्यु भएको हो ।
इलाका प्रहरी कार्यालय रानीका प्रहरी निरीक्षक दीपक थापाले १३ वर्षीय मोहम्मद इरफानको आँपको रूखबाट लडेर मृत्यु भएको जानकारी दिए ।
स्थानीय बासिन्दाले बालकलाई रूखबाट लडेर बेहोस भएको अवस्थामा रूखको फेदमा फेला पारेका थिए ।
उपचारका लागि कोसी अस्पताल लैजाँदै गर्दा बालकको बाटोमै मृत्यु भएको प्रहरीले जनाएको छ ।
नहरको डिलमा भेटियो युवाको शव
मोरङ बेलबारी– ७ स्थित नहरको डिलमा एक युवाको शव भेटिएका छ ।
कानेपोखरी गाउँपालिका– १ होक्लाबारीका का १८ वर्षीय आयुश गिरीको शव नहरको डिलमा भेटिएको हो ।
शव पोष्टमार्टमका लागि मंगलबारे अस्पताल उर्लाबारी पठाइएको इलाका प्रहरी कार्यालय बेलबारीका प्रहरी निरीक्षक ऋषिराज ढकालले बताए ।
स्थानीयले भने मृतक गिरीको शरीरका विभिन्न अंगमा चोटपटक देखिएकाले हत्या भएको आशंका गरेका छन् ।
मृतक गिरीसहित केही युवाहरू राति अबेरसम्म हल्ला गर्दै हिँडिरहेकाले आफ्नै साथीहरूसँग झगडा हुँदा उनको मृत्यु भएको हुन सक्ने स्थानीयको अनुमान छ ।
प्रहरीले भने पोेष्टमार्टम रिपोर्ट नआएसम्म केही भन्न नसक्ने जनाएको छ ।