हत्या आरोपमा दुई बालक प्रहरी नियन्त्रणमा
रुकुम पूर्वमा युवतीको हत्या आरोपमा दुई बालकलाई प्रहरीले नियन्त्रणमा लिएको छ ।
पुथाउत्तरगंगा गाउँपालिका– ८, खराङकी २२ वर्षीया दिलकुमारी सेनको हत्या गरेको आरोपमा शनिबार सोही ठाउँका १५ र १६ वर्षका दुई बालकलाई प्रहरीले नियन्त्रणमा लिएको हो । दुई बालकले दाउराका लागि रूख ढाल्ने क्रममा वनबाट दाउरा लिएर घर फर्कंदै गरेकी सेनलाई रूखले च्यापेको थियो ।
शनिबार साँझ जिल्ला अस्पताल रुकुमकोटमा उपचारको क्रममा सेनको मृत्यु भएपछि अनुसन्धानका लागि दुवै बालकलाई नियन्त्रणमा लिइएको जिल्ला प्रहरी कार्यालयका सूचना अधिकारी प्रहरी निरीक्षक दिनेश गुरुङले बताए । घटनाको अनुसन्धानका लागि उनीहरूलाई आइतबार जिल्ला अदालतमा पेस गरी पाँच दिनको म्याद थप गरिएको उनले बताए ।
दुवैजना १८ वर्षमुनिका भएकाले प्रहरीले उनीहरूको नाम भने सार्वजनिक गरेको छैन । उनीहरू बालक भएकाले बाल इजलासमा सुनुवाइ हुने पनि प्रहरीले जनाएको छ ।