काठमाडौं उपत्यकामा आइतबार लकडाउन उल्लंघन गर्ने १२ सय ८८ जना प्रहरी नियन्त्रणमा
कोरोना भाइरसको संक्रमण फैलन नदिन सरकारले लागू गरेको लकडाउन उल्लंघन गर्ने १२ सय ८८ जनालाई काठमाडौं उपत्यकाको विभिन्न ठाउँबाट प्रहरीले नियन्त्रणमा लिएको छ ।
काठमाडौं, ललितपुर र भक्तपुरमा आइतबार बिहान ६ बजेदेखि ८ बजेको समयमा उनीहरूलाई नियन्त्रणमा लिइएको हो । अत्यावश्यकबाहेक सडकमा निस्केका उनीहरूलाई नियन्त्रणमा लिएको महानगरीय प्रहरी आयुक्त कार्यालयले जनाएको छ ।
यसरी नियन्त्रणमा लिएकाहरूलाई सार्वजनिक स्थानमा केही घन्टा राखेर फेरि यसरी नहिँड्ने सर्तमा छोडिने प्रहरीले जनाएको छ ।
नियन्त्रणमा लिइएकामा एक हजार ६४ जना पुरुष र दुई सय ८१ जना महिला छन् ।
त्यस्तै, लकडाउनको समयमा अत्यावश्यक सेवाबाहेक र विनापास चलेका एक सय ७२ वटा सवारीसाधनलाई ट्राफिक प्रहरीले नियन्त्रणमा लिएको छ ।
महानगरीय प्रहरी आयुक्तको कार्यालयले लकडाउन कार्यान्वयनका लागि काठमाडौं, ललितपुर र भक्तपुर तीनवटैे प्रहरी परिसरलाई कडा रूपमा प्रस्तुत हुन निर्देश दिएको जनाएको छ ।