बिपी कोइराला स्वास्थ्य विज्ञान प्रतिष्ठानका सहप्रवक्ता डा. अशोक ऐरले स्थानीय स्वास्थ्य संस्था, जिल्ला अस्पताल र क्षेत्रीय अस्पतालहरूमा सम्भव हुने उपचारका बिरामी पनि धमाधम प्रतिष्ठानमा रेफर भइरहेकाे बताएका छन् ।
कोरोना संक्रमणमा सजगता अपनाउन सरकारले जारी गरेको लकडाउनमा बिरामीमाथि इमोसनल अत्याचार हुन थालेको भन्दै प्रतिष्ठानका चिकित्सकले चिन्तासमेत व्यक्त गरेका छन् । जिल्ला अस्पतालमै उपचार सम्भव हुने बिरामीलाई समेत प्रतिष्ठानमा रेफर गर्दा बिरामीमाथि अन्याय र कोरोनाको जोखिम बढ्ने उनीहरूको भनाइ छ ।
प्रतिष्ठानको प्रसूति विभागमा अहिले दैनिक आठदेखि १० वटा शल्यक्रिया र ३० भन्दा बढी 'नर्मल केस' आइरहेको अस्पताल प्रशासनले जनाएको छ । सिराहा, सप्तरी, रौतहटबाट समेत सामान्य अवस्थाको बिरामी ल्याउँदा अस्पतालमा भिडभाड बढेको र कोरोनाको जोखिम बढेको भन्दै प्रतिष्ठान प्रशासनले चिन्ता व्यक्त गरेको छ ।