अमेरिकी राष्ट्रपति डोनाल्ड ट्रम्पले कोरोना भाइरसको संक्रमण रोक्न लागू गरिएका नयाँ नियमको अवधि थप एक महिना लम्ब्याएका छन् ।
एक–अर्काबीचको दूरी कायम गर्नुपर्ने, धेरै मानिस भेला हुन नपाउनेलगायतका नियम अझै एक महिनाका लागि थप गरिएको हो ।
२५ मार्चमा ट्रम्पले अमेरिका आउँदो अप्रिलको मध्यतिर पूर्वीय देशहरूभन्दा अगाडि नै अमेरिकाले संक्रमणबाट राहत पाउने र सजगताका लागि लगाइएको नयाँ नियमहरू हटाउने बताएका थिए ।
तर, अपेक्षा गरेजस्तो संक्रमण नियन्त्रणमा हुनुको साटाे थप संक्रमण हुन थालेपछि नियमको म्याद थपिएको हो ।
ह्वाइटहाउसका मेडिकल सल्लाहकार डा. एन्थोनी फौसीले अमेरिकामा कोरोना भाइरसबाट कम्तीमा दुई लाखको मृत्यु हुन सक्ने चेतावनी दिएका छन् ।
लाखौँ अमेरिकी यसबाट संक्रमित हुन सक्ने भन्दै त्यसले मृत्युदर पनि बढाउने उनको चेतावनी छ ।
अमेरिका अहिले विश्वमै सबैभन्दा बढी संक्रमित भएको देशका रूपमा रहेको छ । अहिलेसम्म एक लाख ४० हजारभन्दा बढी अमेरिकी नागरिक कोरोनाबाट संक्रमित भइसकेका छन् । अमेरिकामा दुई हजार आठ सयभन्दा बढीको मृत्यु भइसकेको छ ।
(एजेन्सी)