तीन दिनमा ८७ हजार ग्यास सिलिन्डर बिक्री
नेपाल आयल निगमले पछिल्लो तीन दिनमा ८७ हजार ग्यास सिलिन्डर बिक्री गरेकाे छ ।
विभिन्न उद्योगले डिलर तथा बिक्रेतामार्फत पछिल्लो तीन दिनमा ८७ हजार ग्यास सिलिन्डर बिक्री गरेको निगमले जनाएकाे छ ।
निगमका प्रवक्ता विनीतमणि उपाध्यायले शुक्रबार, शनिबार र आइतबार (तीन दिन)मा ८७ हजार ६ सय ३० ग्यास सिलिन्डर भरेर बिक्री–वितरण गरिएको जानकारी दिए ।
उनका अनुसार शुक्रबार ३३ हजार ६ सय ५८ ग्यास सिलिन्डर, शनिबार १४ हजार एक सय आठ सिलिन्डर र आइतबार ३९ हजार आठ सय ६४ ग्यास सिलिन्डर बिक्री–वितरण गरिएको हो ।
उक्त बिक्री–वितरण काठमाडौं उपत्यकासहित देशैभरिकाे भएको उपाध्यायले बताए ।
पछिल्लो समय नेपाल आयल निगमले उपभोक्तामा ग्यासको अभाव सिर्जना हुन नदिन प्रयासरत रहेको निगमले जानकारी दिएको छ ।
अभाव हुन नदिने उद्देश्यले निगमले सिलिन्डरमा आधा ग्यास भरेर बिक्री–वितरण गर्न ग्यास उद्योगीलाई निर्देशन दिइसकेको छ ।