संसद् सञ्चालन गर्न प्रतिपक्षीको माग
सुदूरपश्चिम प्रदेश सभामा प्रतिपक्षी दलहरूले संसद् सञ्चालन गर्न माग गरेका छन् । प्रदेश सभामा प्रमुख प्रतिपक्षी कांग्रेस र प्रतिपक्षी राष्ट्रिय जनता पार्टीले संयुक्त पत्रकार सम्मेलन गर्दै प्रदेश सभा बैठक सञ्चालन गर्न माग गरेका हुन् ।
संसद् नबस्दा समसामयिक विषयमा सदनमा छलफल गर्न र सरकारको ध्यानाकर्षण गर्न नपाएको कांग्रेस संसदीय दलका नेता डा. रणबहादुर रावलले बताए । कञ्चनपुरमा लालपुर्जा भएको जमिन भारतमा परेको, कोरोनाको त्रास, विकास निर्माणमा भइरहेको ढिलाइ र अनियमिततालगायत जनसरोकारका विषयमा धारणा राख्न नपाइएको भन्दै उनले तत्काल बैठक बोलाउन माग गरे ।
राजपा संसदीय दलका नेता कृष्णकुमार चौधरीले सदनलाई लामो समय बन्द राख्न नहुने बताए । ‘सीमा, अपराध, कोरोना, सरकारका निकायमा भएका आर्थिक अनियमितता आदि समसामयिक विषय सदनमा उठाउन चाहेका छौँ । सदन सञ्चालन गर्नुप¥यो,’ चौधरीले भने । आलोचना छल्न पनि सरकारले सदन सञ्चालन गर्न नखोजेको प्रतिपक्षीको आरोप थियो ।