मनाङमा फागुनको अन्तिम साता भइसक्दा पनि हिमपात भइरहेको छ । नेपालकै महत्वपूर्ण पर्यटक मार्ग अन्नपूर्ण पदमार्गमा पर्ने मनाङ जिल्लामा हिमपात भएसँगै चिसो बढेको छ ।
जिल्लाका अधिकांश ठाउँमा शनिबार बिहानैदेखि हिउँ परेको मनाङका प्रमुख जिल्ला अधिकारी पुस्पराज पौडेलले बताए ।मनाङको माथिल्लो भेग नार, फु , खाङसार संगै मनाङ र चामेमा समेत बाक्लो हिमपात भएको शसस्त्र प्रहरी बल नेपाल नम्बर ३२ गुल्म मनाङका इन्स्पेक्टर सुवास थापाले बताए । उनका अनुसार चामेस्थित विभिन्न सरकारी कार्यालय परिसरमा बाक्लै हिउँ जमेको छ ।
बेमौसमी हिउँ परेसँगै चिसो समेत बढेको छ । हिमपातका कारण जनजीवन कष्टकर भएको छ । हिमपातसँगै दानक्युदेखि चामेसम्म सवारीसाधन आवतजावत गर्न सकेको छैन । हिमपातले कृषक भने खुसी भएका छन् । बेमौसमी हिउँले उत्पादन बढ्ने कृषक बताउँछन् ।