विश्व

राष्ट्रपतिको आलोचना गरेपछि संसदमै कुटिए टर्कीका सांसद

राष्ट्रपतिको आलोचना गरेपछि टर्कीका एक सांसद संसदमै कुटिएका छन्। संसद बैठकमा विपक्षी दलका सांसदले राष्ट्रपति रिसेप एर्दोगानको आलोचना गरेपछि सांसदहरुबीच झगडा भएको थियो । 

सांसद एन्जिन ओजकोकले राष्ट्रपति एर्दोगानको सिरियाको इडलिबमा गत साता मारिएका ३४ सैनिकको अपमान गरेको भन्दै बैठकै क्रममा कडा आलोचना गरेका थिए । 

ओजकोकले एर्दोगानलाई ‘बेइमान, अज्ञानी, नीच र विश्वासघाती’ भनेका थिए । उनले राष्ट्रपतिबारे बोलेपछि केही सांसदले ओजकोकमाथि मुड्की प्रहार गरेका थिए । केहीले झगडा रोक्न खोजिरहेका थिए, झगडाको क्रममा कतिपय सांसदहरु भुइँमै लडेका टर्कीको टेलिभिजन हाबरर्तुकले जनाएको छ । 

İşte Meclis'teki kavga anlarıhttps://t.co/tKF4IPGMbM pic.twitter.com/MQNe08Sr9C

— Cumhuriyet (@cumhuriyetgzt) March 4, 2020

राष्ट्रपतिको आलोचना गर्ने ओजकोक रिपब्लिकन पिपल्स पार्टीका सांसद हुन्। उनले राष्ट्रपतिविरुद्ध लड्न टर्किस जनतालाई बालबालिका पठाउन आग्रहसमेत गरेका थिए । 

टर्कीले सन् २०१८ मा रसियासँग सम्झौतापछि त्यस क्षेत्रबाट सिरियाली फौज हटाउन खोजिरहेको छ र अहिलेसम्म त्यहाँ १२ वटा निगरानी चौकी स्थापना गरेको छ । प्रतिपक्षी दलले भने सिरियाली युद्धलाई लिएर सरकारको आलोचना गर्दै आइरहेको छ । 

यतिबेला टर्कीले सिरियामाथि आक्रमण गर्न सुरु गरेदेखि ५४ जना सैनिक मारिइसकेका छन् भने १० लाखभन्दा बढी मानिस इडलिब छोडेर टर्की पसेका छन्। बिहीबर रसियाका राष्ट्रपति भ्लादिमिर पुटिन र एर्दोगानबीच युद्धविराम गर्ने विषयमा वार्ता पनि हुनेछ ।