फेवातालमा डुंगा डुब्दा वेपत्ता लुईंटेल मृत फेला
फेवातालमा सोमबार डुंगा डुब्दा वेपत्ता भएका एक जना मंगलबार मृत फेला परेका छन् ।
काठमाडौं महानगरपालिका–१० कपनका २७ वर्षीय सुमित भन्ने रामशरण लुईंटेल मंगलबार मृत फेला परेको वडा प्रहरी कार्यालय बैदामका प्रमुख प्रहरी नायब उपरीक्षक यादव ढकालले जानकारी दिए ।
डुंगामा सवार तीन जनामध्ये कपनकै २७ वर्षीय सुविन चालिसे र २८ वर्षीय रूपेश अधिकारीको भने प्रहरी, डुंगा व्यवसायीे र अन्यको सहयोगमा तत्काल सकुशल उद्धार गरिएको थियो । लुईंटेल डुबेको स्थान वरपर सोमबारै खोजी गरिए पनि भेटिएको थिएन । मंगलबार बिहानैदेखि उनको खोजी कार्य गरिएको थियो ।
डिएसपी ढकालका अनुसार उनीहरू आफैँले डुंगा चलाएका थिए । खपौदी क्षेत्रमा पुगेपछि पानी भरिएकाले डुंगा डुबेरको थियो । घटनाका विषयमा प्रहरीले थप अनुसन्धान गरिरहेको जनाएको छ ।