बाँस्कोटाको अडियो सार्वजनिक भएपछि के गर्यो कांग्रेसले ?
सञ्चार तथा सूचना प्रविधिमन्त्री गोकुल बाँस्कोटाले ७० करोड कमिसन मागेको अडियो बिहीबार सार्वजनिक भएपछि सबैको ध्यान यसतर्फ केन्द्रित भयो । पार्टीको निर्देशनमा अन्ततः बाँस्कोटाले पदबाट राजीनामा दिए ।
बाँस्कोटाको अडियो सार्वजनिक भएपछि प्रमुख प्रतिपक्ष कांग्रेसको सक्रियता निकै बढ्यो । भ्रष्टाचारीको अनुहारसमेत नहेर्ने भनेका प्रधानमन्त्री केपी शर्मा ओली नेतृत्व सरकारका प्रवक्तासमेत रहेका बाँस्कोटाविरुद्ध सार्वजनिक अडियोले राजीनामा दिन बाध्य बनायो ।
अडियो सार्वजनिक भएपछि कांग्रेसको सक्रियता
बाँस्कोटालाई तत्काल बर्खास्त र निष्पक्ष अनुसन्धानको माग गर्दै बिहान ११ बजे नै कांग्रेसले विज्ञप्ति जारी गरेको थियो ।
पत्रकार सम्मेलन
बाँस्कोटाकै विषयमा कांग्रेसले साढे १२ बजे पार्टी मुख्यालय सानेपामा पत्रकार सम्मेलन गर्दै सरकारमाथि कटाक्ष गर्यो । पार्टी प्रवक्ता विश्वप्रकाश शर्माले प्रधानमन्त्री ओलीलाई प्रश्न गरे । ‘भ्रष्टाचारीको मुखसम्म हेर्दिनँ भन्ने प्रधानमन्त्रीले बाँस्कोटाको अडियो सुन्नुभयो होला नि ?
विद्यार्थीको प्रदर्शन
बाँस्कोटा धनगढीबाट काठमाडौं फर्कंदै गर्दा कांग्रेसको भातृ संगठन नेविसंघले दिउँसो ३ बजे त्रिभुवन अन्तर्राष्ट्रिय विमानस्थलमा कालो झण्डा देखाए । झन्डा देखाएको आरोपमा प्रहरीले नेविसंघ नेता विष्णुहरि खड्कालाई नियन्त्रणमा लियो । कालो झण्डा देखाउँदै नेविसंघले बाँस्कोटाको राजीनामा माग गरेका थिए ।
संसद अवरुद्ध
बाँस्कोटाको राजीनामा माग गर्दै कांग्रेसले बिहीबार राष्ट्रियसभा र प्रतिनिधिसभा बैठक अवरुद्ध गरेको थियो । कांग्रेस सांसदहरूले सरकारको समृद्ध नेपाल सुखी नेपालीको नारा अब समृद्ध गोकुल बाँस्कोटा, सुखी केपी ओलीमा परिणत भएको भन्दै कटाक्ष गरेका थिए ।