महराको मुद्दामा सुनुवाई सकियो, फैसला हुन सकेन
निवर्तमान सभामुख कृष्णबहादुर महराविरुद्धको मुद्दाको अन्तिम सुनुवाई सकिएको छ । सुनुवाई मात्र सकिएका कारण आज फैसला भने हुन सकेन ।
महराविरुद्ध बलात्कार उद्योग कसूर सम्बन्धी लागेको मुद्दामा काठमाडौं जिल्ला अदालतमा आइतबार अन्तिम बहस सकिएको हो ।
आइतबार जिल्ला न्यायाधीश बम्बरराज पौडेलको इजलासमा अन्तिम सुनुवाई सम्पन्न भएको हो । महराको पक्षबाट रमण श्रेष्ठ, शेरबहादुर केसी, लभ मैनाली, दिनमणि पोखरेल, भीमार्जुन आचार्यलगायत वकिल र सरकारी पक्षबाट उमाकान्त खनाललगायतका वकिलले बहस गरेका थिए ।
संघीय संसदको सचिवालयमा कार्यरत एक कर्मचारीलाई बलात्कार प्रयास गरेको अभियोगमा महराविरुद्ध जिल्ला अदालत काठमाडौंमा मुद्दा दर्ता भएको थियो । महरा गत कात्तिक १८ देखि पुर्पक्षका लागि थुनामा छन् ।