नेपाल वायुसेवा निगमका तीन वटा 'वाइ १२' जहाज ग्राउन्डेड भएका छन् । एउटा वाइ १२ मात्र उडिरहेको छ । निगमका अधिकारी भने ती जहाज पालैपालो उड्ने गरेको र अहिले सबै जहाजको डिमान्ड पनि नभएको बताउँछन् ।
लामो समयसम्म जहाज ग्राउन्डेड हुनुको कारण प्राविधिक गडबडी रहेको बताउँदै आएका छन्, निगमका सरोकारवाला । ती जहाज समयमै उड्ने बनाउनका लागि पहल भइरहेको निगमकी प्रवक्ता अर्चना खड्काले बताइन् ।
आन्तरिक उडानका लागि निगमसँग हाल चार वटा 'वाइ १२' र दुई वटा एमए ६० लगायत ६ वटा चिनियाँ र तीन वटा ट्विनअटर जहाज छन् । ती तीन वटै 'वाइ १२' जहाज आएदेखि नियमित उडानसमेत गरेका छैनन् । त्यस्तैगरी निगमका दुईमध्ये एउटा एमए ६० जहाज पनि विगत चार वर्षदेखि ग्राउन्डेड छ ।