भुक्तानी नपाएका उखु किसान तेस्रो चरणको आन्दोलनकाे तयारीमा
सरकारसँग भएको सहमती बमोजिम भुक्तानी नपाएपछि उखु किसानले तेस्रो चरणको आन्दोलन गर्ने घोषणा गरेका छन् ।
किसानले काठमाडौंमा आन्दोलन गरेपछि सरकारले उखु किसानसँग ७ माघ भित्र बक्यौता भुक्तानी गराउने लिखित प्रतिवद्धता जनाएको थियो ।
सहमती बमोजिम सरकारले दिनुपर्ने अनुदान तथा उद्योगले बाँकी राखेको भुक्तनी नपाएपछि संघर्ष समितिले आन्दोलनका विभिन्न कार्यक्रम बनाएको हो ।
समितिले आइतबार विज्ञप्ती जारी ४ चैतदेखि काठमाडौंको माइतीघर मण्डलामा अनिश्चितकालिन रिले अनसन बस्ने कार्यक्रम तय गरेको छ ।
किसानले पाउन बाँकी भुक्तानीको विवरण संकलन गर्ने, एकछाक मात्र खाने, किसानलाई काठमाडौं उतार्न प्रचार कार्यक्रम चलाउनेलगायत आन्दोलनका कार्यक्रम समितिले बनाएको छ ।
विज्ञप्तीमा उखु किसान संघर्ष समितिका अध्यक्ष रामस्वार्थ राय, सचिव हरिश्याम राय र उखु किसान रामविलास महतोले हस्ताक्षर गरेका छन् ।
किसानहरुको मागमा सरकार गम्भीर नभए आन्दोलनबाट उत्पन्न हुने परिणामको जिम्मेवार सरकार हुनुपर्ने संर्घष समितिका अध्यक्ष रायले चेतावनी दिए ।