त्रिभुवन विमानस्थलमा कार्यरत् सुरक्षाकर्मीमाथि दुर्व्यवहार गरेको आरोमा प्रहरी नियन्त्रणमा रहेकी आस्था राउतप्रति प्रहरी नरम बनेको छ । महानगरीय प्रहरी परिसर काठमाडौंको नियन्त्रणमा रहेकी आस्था अन्य अभियुक्त सरह कैदी कोठामा समेत बस्नु परेको छैन । उनलाई समान्य कानुनी प्रक्रिया गरेर छाड्ने तयारी भइरहेको छ ।
दुर्व्यवहारको आरोपमा आफुमाथि पक्राउ पुर्जी जारी भएपछि आस्था सोमबार बिहान आफै प्रहरी परिसरमा उपस्थित भएकी थिइन् । प्रहरीसँग आस्थाले आफुबाट विमानस्थल भएको घटनाप्रति माफि माग्दै प्रहरीलाई सहयोग गर्ने बताइन् ।
महानगरीय प्रहरी परिसर काठमाडौंका प्रवत्ता होविन्द्र बोगटीले भने ‘आस्था राउतले आफुमाथि लागेको आरोपको विषयमा स्वयं प्रहरी कार्यालयमा आएर कारवाही प्रक्रियालाई सहयोग गर्छु भन्नु भएको छ । कानुनको सम्मान गर्दै आफुमाथि लागेको आरोपको विषयमा स्वयं प्रहरी कार्यालयमा उपस्थित भएकोले प्रहरीले पनि उनलाई सोही अनुसारको व्यवहार गर्ने छ । ’
परिसरले उनलाई कानुनी प्रक्रियाको लागिमात्र म्याद थपका लागि काठमाडौं जिल्ला प्रशासन कार्यालयमा उपस्थित गराएको छ । कागजी प्रक्रिया पूरा गरेर आजै आस्थालाई छाडने तयारी भैरहेको परिसर स्रोतले जनाएको छ ।