प्रमुख प्रतिपक्षी दल नेपाली कांग्रेस भित्र देखिएको आन्तरिक विवाद समाधानमा गर्न देउवा निवास बुढानिलकण्ठमा जुटेका शीर्ष नेताहरुको बैठक बिना निष्कर्ष सकिएको छ । 

बुधवार दिउँसो ३ बजेदेखि साढे चार घण्टासम्म चलेको बैठकले पार्टी सभापति शेरबहादुर देउवा, वरिष्ठ नेता रामचन्द्र पौडेल र नेता कृष्णप्रसाद सिटौला विच पुनः छलफल जारी राख्ने सहमति भने जुटेको छ । त्यसैगरी बुधबार सहभागि नेताहरु सहित फेरि शुक्रवार छलफल गर्ने सहमति पनि भएको छ । 

कांग्रेस प्रवक्ता विश्वप्रकाश शर्माले बैठक बारे प्रतिक्रिया दिंदै शीर्ष नेताहरु बीच पार्टीको आन्तरिक विषयका बारेमा देखा परेका बिबाद बारे समझदारी नजिक पुगेको जानकारी दिए । उनले बुधबारको बैठकले समझदारी नजिक पुर्याएको र शुक्रवार बस्ने बैठकले औपचारिकता दिने दाबी गरे । 

महाधिवेशनको मिति घोषणा, सदस्यता सम्बन्धी विधानको धारा निलम्बन र विभाग संख्या थप जस्ता विषयमा सभापति शेरबहादुर देउवा र वरिष्ठ नेता पौडेलबीच विवाद रहँदै आएको छ । 

बैठकमा सभापति देउवा, वरिष्ठ नेता पौडेल, कृष्णप्रसाद सिटौला, उपसभापति विमलेन्द्र निधि, पूर्वमहामन्त्री प्रकाशमान सिंह लगायतका नेता सहभागी रहेका थिए ।