नेपाल एयरलाइन्सका आन्तरिक टिकट अनलाइनमा
नेपाल वायुसेवा निगमका आन्तरिक उडानका टिकट अब अनलाइनबाटै खरिद गर्न सकिने भएको छ । निगमले आइतबारदेखि अनलाइन टिकेटिङ प्रणाली प्रारम्भ गरेको हो ।
यसअघि साउन ०७४ मा अन्तर्राष्ट्रिय उडानतर्फ अनलाइन टिकेटिङ सुरु गरिएको थियो । निगमका कार्यकारी अध्यक्ष मदन खरेलले यस प्रणालीको शुभारम्भ गरे । यससँगै अब आन्तरिक उडानमा पनि यात्रुले घरैमा बसी टिकट खरिद गर्न सक्नेछन् ।
कार्यक्रममा कार्यकारी अध्यक्ष खरेलले निगम क्रमशः सेवा विस्तारमा लागेको भन्दै ग्राहकलाई थप सुविधा दिने सन्दर्भमा आन्तरिक उडानका लागि अनलाइन टिकेटिङ प्रणाली थालिएको बताए । साधारण सेवा तथा सम्पत्ति व्यवस्थापन विभागका निर्देशक अमृतमान श्रेष्ठले नयाँ प्रविधि प्रयोगमा निगम सक्रिय रहेको भन्दै सोहीअनुसार सेवा थपिएको बताए ।