सुदूरपश्चिम प्रदेश मनमोहन स्मृति राष्ट्रिय एकदिवसीय क्रिकेट प्रतियोगिताको सेमिफाइनलमा प्रवेश गरेको छ । इनरुवा मैदानमा सञ्चालन भइरहेको प्रतियोगिताको समूह डीमा आइतबार सुदूरपश्चिमले गण्डकी प्रदेशमाथि नौ विकेटको जित निकाल्दै अन्तिम चारमा स्थान पक्का गरेको हो ।
समूहमा अपराजित रहेको सुदूरपश्चिमले दुई खेलबाट सर्वाधिक चार अंक बटुलेको छ । पहिलो ब्याटिङ गरेको गण्डकी प्रदेश सुदूरपश्चिमविरुद्ध ब्याटिङमा चुक्यो । विनोद लामाले सात विकेट लिए पछि गण्डकी २३.३ ओभरमा ६४ रनमै अलआउट भयो ।
सहज लक्ष्य पछ्याएको सुदूरपश्चिमले १०.२ ओभरमा एक विकेटको नोक्सानीमा ६७ रन जोड्दै सानदरा जित निकाल्यो ।