जनकपुरधाम उपमहानगरपालिकामा मंगलवार भएको पत्रकार र कर्मचारीबीच हातहालाहालको घटनालाई लिएर दुवै पक्षले जिल्ला प्रशासन कार्यालयमा ज्ञापनपत्र बुझाएका छन् ।
नेपाल पत्रकार महासंघ धनुषा शाखाले बुधवार पत्रकारमाथि आक्रमण र दुर्व्यवहार गर्नेलाई कारवाहीको माग गर्दै धनुषाका प्रमुख जिल्ला अधिकारी प्रदिपराज कँडेललाई ज्ञापन पत्र बुझाईएको छ ।
पत्रकारमाथि हातपात गर्ने माथि कारवाही, जानकी मन्दिरको फुलवारीको जग्गा अतिक्रमण गर्ने कारवाही, प्रत्येक स्थानीय निकायमा सुचना अधिकारी नियुक्त हुनुपर्ने लगायतका माग ५ दिनमा पुरा नभएर महासंघ धनुषा शाखा आन्दोलनमा जाने प्रेस विज्ञप्तीमा उल्लेख छ ।
उता आफ्ना महिला कर्मचारीलाई कुटपिट तथा दुव्र्यवहार गर्ने केही पत्रकारलाई कारर्वाहीको माग गर्दै जनकपुरधाम उपमहनगरपालिका कर्मचारीले पनि प्रमुख जिल्ला अधिकारीलाई ज्ञापनपत्र बुझाएका छन् ।
उपमहानगरपालिकाको कार्यालयबाट ‘गुण्डागर्दि पत्रकारिता मुर्दावाद’ सहितका प्लेकार्ड तथा नारा लगाउँदै कर्मचारीहरुले जिल्ला प्रशासन कार्यालय पुगि करिव एक घण्टा धर्ना समेत दिएका थिए । जनकपुरधाम उपमहनगरपालिका कर्मचारी एसोसिएनका अध्यक्ष कृष्णदेव झाको नेतृत्वमा कर्मचारीहरुले प्रजिअ कँडेललाई ज्ञापनपत्र बुझाएका हुन् ।
घटनाको दोषिलाई कारवाहीको माग गर्दै कर्मचारीहरुले आन्दोलनका कार्यक्रम समेत घोषणा गरेका छन् । २३ पुसदेखि २५ पुससम्म दैनिक रुपमा एक/एक घण्टा थप गरि पेनडाउन गर्ने र २५ गतेसम्म कारवाही नभएर थप आन्दोलनको घोषणा गर्ने कर्मचारीद्वारा बुझाइएको ज्ञापनपत्रमा उल्लेख छ ।