बनेपा नगरपालिका महानगर कप भलिबलअन्तर्गत पुरुषतर्फको क्वार्टरफाइनलमा प्रवेश गरेको छ । आइतबार कीर्तिपुर नगरपालिकालाई ३–० को सेटमा पराजित गर्दै बनेपा अन्तिम आठमा पुगेको हो । जावलाखेल भलिबल प्रशिक्षण केन्द्रमा बनेपाले कीर्तिपुरलाई २५–१०, २५–१३ र २५–२१ को सेटमा पराजित गर्यो ।
जितसँगै समूह बीमा बनेपाले ३ अंक जोड्यो । कीर्तिपुर लगातार दुई हारसँगै प्रतियोगिताबाट बाहिरिएको छ । पहिलो खेलमा कीर्तिपुर कागेश्वरी मनोहरासँग पराजित भएको थियो । कीर्तिपुरको हारसँगै कागेश्वरी पनि क्वार्टरफाइनलमा पुगेको छ । समूह बीमा विजेता र उपविजेता छिनोफानो हुन बाँकी छ ।
अर्को खेलमा चौतारा नगरपालिकाले ललितपुर महानगरपालिकालाई ३–१ को सेटमा हराएको छ । पुरुषतर्फ महालक्ष्मी नगरपालिकाले पनौती नगरपालिकालाई ३–० को सेटमा पराजित गरेको छ । कमलामाई नगरपालिकाले गोकर्णेश्वर नगरपालिकामाथि ३–० को सोझो सेटमा निराश पार्यो ।
महिलातर्फ ललितपुर महानगरपालिकाले बनेपालाई ३–० को सेटमा हराएको छ । ललितपुरले बनेपामाथि २५–५,२५–११ र २५–१८ ले पराजित गरेको हो । महिलातर्फ नै हेटौँडाले टोखालाई सोझो सेटमा पाखा लगायो । त्यस्तै, अर्को खेलमा गोकर्णेश्वरले विदुर नगरपालिकालाई ३–० ले पराजित गर्यो ।