नयाँ पत्रिका समाचार प्रभाव : वीरको सय बेडको भवन प्रयोगविहीन भएकोमा स्वास्थ्यमन्त्रीको चासो
न्याम्सका पदाधिकारीलाई बोलाएर भने–मन्त्रालयले सहयोग गर्छ, भवन चलाउनुस्
स्वास्थ्यमन्त्री भानुभक्त ढकालले वीर अस्पतालको अलपत्र सय बेडको भवन सञ्चालनमा ल्याउन चिकित्सा विज्ञान राष्ट्रिय प्रतिष्ठान (न्याम्स)का पदाधिकारीलाई निर्देशन दिएका छन् । जापानले बनाइदिएको सय बेडको भवन वीरले प्रयोग नगरेको समाचार नयाँ पत्रिकामा छापिएपछि मन्त्री ढकालले न्याम्सका पदाधिकारीलाई मन्त्रालयमै बोलाएर निर्देशन दिएका हुन् ।
न्याम्स र मन्त्रालयका पदाधिकारीलाई मन्त्री ढकालले वीरको भवन सञ्चालन नहुनुको कारण सोधेका थिए । न्याम्सका पदाधिकारीले आर्थिकलगायत समस्यका कारण मेसिन किन्न नसकेको बताएका थिए । छलफलपछि मन्त्रीले आवश्यक सहयोग मन्त्रालयले गर्ने वचन दिँदै भवन सञ्चालनमा ल्याउन निर्देशन दिएका छन् ।
‘वीरको भवन अलपत्र परेको समाचार हेरेपछि तत्काल मन्त्रालय र न्याम्सका पदाधिकारी बोलाएर छलफल गरेँ । सञ्चालन किन ढिला भयो भनेर जिज्ञासा राखेँ, उहाँहरूको कुरा सुनेँ,’ मन्त्री ढकालले नयाँ पत्रिकासँग भने, ‘अस्पताल चल्नुपर्छ, जनताले सेवा पाउनुपर्छ । मन्त्रालयबाट गर्नुपर्ने सहयोग गर्छौँ भनेको छु ।’
न्याम्सका एक पदाधिकारीले पनि मन्त्रीले भवन सञ्चालनमा सहयोग गर्ने वचन दिएको बताए । ‘उहाँले भवन चलाउनु, मन्त्रालयले सहयोग गर्छ भन्नुभएको छ,’ ती
पदाधिकारीले भने । मन्त्रीले न्याम्सका उपकुलपति प्रा.डा. डिएन शाह, वीर अस्पतालका निर्देशक डा. केदार सेन्चुरी, मन्त्रालयका सचिव खगराज बराल, गुणस्तर तथा नियमन महाशाखा प्रमुख डा. दीपेन्द्ररमण सिंहलगायतसँग छलफल गरेका हुन् ।
देशकै जेठो अस्पताल वीरका लागि जापानी सहयोग नियोग (जाइका)ले ८८ करोड लागतमा ३० बेडको आइसियूसहितको तीनतले भवन बनाएर हस्तान्तरण गरेको पाँच महिना भइसकेको छ । मुटु, मिर्गौला र ग्यास्ट्रोको सेवा उपलब्ध गराउने गरी भवन बनाइएको छ । अपांगमैत्री र शौचालयको विशेष सुविधा भएका कक्षहरू छन् । तर, बनेको भवन अलपत्र हुँदा वीर अस्पताल आउने कम्तीमा १० बिरामी हरेक दिन निजी अस्पतालको आइसियूमा रेफर हुने गरेका छन् ।
भवन सञ्चालनमा नआएपछि जाइकाले ताकेता गर्दै आएको छ । सरकारबाट सहमति गरेर आए आवश्यक मेसिनसमेत खरिद गरिदिने भन्दै दबाब दिइरहेको न्याम्सका पदाधिकारीले बताएका छन् । स्वास्थ्य मन्त्रालयका प्रवक्ता मेहन्द्रप्रसाद श्रेष्ठले पनि जाइकाबाट दबाब आइरहेको बताए । जाइकाले भवन बनाइदिने र नेपाल सरकारले उपकरण किन्ने गरी सम्झौता भएको थियो । तर, सरकारले उपकरण व्यवस्थान गर्दा भवन अलपत्र परेको हो ।
जापानले बनाइदिएको सय बेडको भवन वीरले प्रयोग गरेन, बिरामी निजी अस्पताल जान बाध्य