- वि.सं २०८१ बैशाख १४ शुक्रबार
इस्लाम परित्याग गरेकाले परिवारबाटै आफ्नो हत्या हुन सक्ने आशंकामा कुवेतबाट भागेर यसै साता थाइल्यान्ड पुगेकी साउदी युवती रहाफ मोहमद अलक्युननले बैंककस्थित विमानस्थलबाट जीवनरक्षाको याचना गर्दै शृंखलाबद्ध ट्विट गरिन् ।
थाई अध्यागमनको नियन्त्रणमा परेपछि ट्विटरबाट उनले आफू र त्यहाँ भएका घटनाक्रमबारे निरन्तर जानकारी दिन थालिन् र पूरै विश्वको ध्यान आकर्षित गर्न सफल भइन् ।
त्यसवेला ट्विटरमा उनका २४ फलोअर थिए । तर, अहिले हजारौँ फलोअर छन् । उनी बैंकक हुँदै अस्ट्रेलिया पुग्ने योजनामा थिइन् । ‘म कुवेतबाट भागेर थाइल्यान्ड आएकी छु । यहाँको साउदी दूतावासले मलाई कुवेत फर्काउन बल प्रयोग गरेको छ’ विमानस्थलभित्रबाट अरबी भाषामा उनले पहिलो ट्विट गरिन् । थाई अधिकारीहरूले उनलाई कुवेत फिर्ता पठाउने प्रयास गरेका थिए, तर आफू असुरक्षित भएको भन्दै उनी फर्किन मानिनन् ।
त्यसपछि उनले सर्वसाधारणलाई विश्वास नै नलाग्ने अर्को ट्विट गरिन्, ‘मेरै परिवारले मलाई हत्या गर्ने डर छ ।’ उनको यो ट्विटले धेरै मानिसको ध्यानाकर्षण ग¥यो । एक ट्विट प्रयोगकर्ताले उनको पहिलो ट्विटसँगै ह्यासट्याग सेभराहफ ट्विट गरे । केही मिनेटपछि इजिप्टेली मूलकी अमेरिकी कार्यकर्ता मोना इल्थावेले अरबी भाषाको सो ट्विटलाई अंग्रेजी भाषामा उल्था गरिन् र आफ्ना हजारौँ फलोअरलाई पठाइन् ।
केही घन्टापछि सो ट्विटले ह्युमन राइट वाचको ध्यानाकर्षण ग¥यो र अन्ततः वाचका बैंककस्थित उपनिर्देशक फिल रोबर्टसनले सो ह्यासट्याग पुनः रिट्विट गरे । लगत्तै रोबर्टसनले १८ वर्षीया रहाफसँग विमानस्थलमा भेट गरेर उनको उद्धारमा जुटे ।
विमानस्थलको होटेल कक्षबाट उनले गरेको ट्विटले ट्विटर समुदायको सहानुभूति र समर्थन जुटाएको थियो । ह्यासट्याग सेभराहफले एक क्षणमै धेरैको ध्यानाकर्षण गरेको थियो । २४ घन्टामा सो ह्यासट्यागमा ५ लाखभन्दा बढी ट्विट भएको ट्विटरले जनाएको छ ।
दुनियाँले मुस्किलले चिनेकी र जम्मा २४ फलोअर भएका उनको २४ घन्टामा २७ हजारभन्दा बढी फलोअर भएका थिए । अहिलेसम्म उनका ९० हजारभन्दा बढी फलोअर भएका छन् ।
यसैबीच, उनलाई राष्ट्रसंघले शरणार्थीको मान्यता दिएको छ । सोमबार साँझ उनलाई राष्ट्रसंघको शरणार्थीसम्बन्धी निकाय युएनएचसिआरको संरक्षकत्वमा सुवर्णभूमि विमानस्थलबाट बाहिर जाने अनुमति दिइएको थियो ।
