- वि.सं २०८१ बैशाख ११ मंगलबार
भक्तपुर निर्वाचन क्षेत्र नम्बर १ ‘क’ प्रदेशसभा सदस्यमा नेपाली कांग्रेसका उम्मेदवार कृष्णलाल भंडेलले अग्रता कायमै राखेका छन् । चागुनारायण नगरपालिका वडा १ देखि ९ सम्मको मत गनिसक्दा भंडेलले १३ हजार ८३ मत प्राप्त गरेका छन् ।
नेकपाका देवीप्रसाद (डिपी) ढकालले १० हजार ६ सय ९४ पाएका छन् । त्यसैगरी नेपाल मजदुर किसान पार्टीले ३ हजार ८ सय ६० मत ल्याएको छ । करिव ३ हजार मत गन्न बाँकी हुँदा कांग्रेसका उम्मेदवार प्रतिस्पर्धी नेकपाका उम्मेदवारको भन्दा २ हजार ३ सय ८९ मतले अघि छन् ।
सो क्षेत्रमा पर्ने भक्तपुर नगरपालिका वडा १० को मात्र मतगणना बाँकी छ । वडा १० मा २ हजार ९ सय ७७ मत खसेको छ । नेमकिपाको बाहुल्य रहेको उक्त वडाबाटै नेकपा उम्मेदवार ढकालले मतदान गरेका थिए ।
त्यसकारण ढकालले यस वडाबाट कांग्रेसको उम्मेद्वारभन्दा बढी मत ल्याउन सक्ने अनुमान छ । नेमकिपाको बाहुल्य र ढकालले मतदान गरेको वडा हुनाले कांग्रेससँगको मतान्तर नेकपाले घटाए पनि पूर्ववत मतान्तरका आधारमा नेकपाले जित्न असहज छ ।
