जुन–जुन जिल्लामा पकड, त्यहीँ–त्यहीँ विवाद
राजपाको वर्चस्व भएका जिल्लामै तदर्थ समिति गठन अवरुद्ध, विवाद मिलाउन २० दिन थप
राष्ट्रिय जनता पार्टी (राजपा) नेपालको सांगठनिक पकड भएकै जिल्लामा स्थानीय समिति बनाउँदा विवाद देखिएको छ । पार्टीको अध्यक्ष मण्डलले निर्देशिका बनाएर वडा, पालिका, प्रदेश सभा/प्रतिनिधिसभा क्षेत्र र जिल्लामा तदर्थ समिति गठन गर्ने समय तोकेको थियो । पार्टीको वर्चश्व रहेका जिल्लाहरूमा तोकेको समयमा समिति गठन नभएपछि २० दिन समय थपिएको छ ।
अध्यक्ष मण्डलको ८ कात्तिकमा बसेको बैठकले जिल्लाहरूमा वडा, पालिका, प्रदेशसभा÷प्रतिनिधिसभा क्षेत्र र जिल्लामा तदर्थ समिति गठन गर्न ‘तदर्थ समिति गठन निर्देशिका ०७६’ बनाएको थियो । निर्देशिकामा २४ कात्तिकमा वडा, २६ कात्तिकमा पालिका, २८ कात्तिकमा प्रदेशसभा÷प्रतिनिधिसभा र ३० कात्तिकमा जिल्ला समितिमा तदर्थ समिति गठन गरिसक्ने उल्लेख थियो । तर, तोकिएको समयमा पार्टीको पकड भएका जिल्लामा विवादका कारण अधिवेशन सम्पन्न हुन नसकेपछि अधिवेशन गर्ने म्याद थपिएको छ ।
बुधबार बसेको अध्यक्ष मण्डलको बैठकले लोकतान्त्रिक विधि प्रक्रियाबाट समाधान गर्न भन्दै २० दिनको समय थप गर्ने निर्णय गरेको हो । ‘कतिपय ठाउँमा तदर्थ समितिहरू गठन गर्न बाँकी रहेकोले सो बाँकी कार्य सोही निर्देशिकाबमोजिम सम्पन्न गर्न र केही ठाउँहरूमा समस्या देखिएकोले ती समस्याहरू सहमति तथा लोकतान्त्रिक विधि प्रक्रियाबाट समाधान गर्न २० दिन समय थपिएको छ,’ बैठकपछि संयोजक महन्थ ठाकुरद्वारा जारी विज्ञप्तिमा छ ।
बैठकले अधिवेशन गर्न खटाएका केन्द्रीय पर्यवेक्षकलाई तोकिएको क्षेत्रमा पुगेर २५ मंसिरभित्र तदर्थ समिति गठनसम्बन्धी कार्य सम्पन्न गरी ३० मंसिरमा बोलाइएको पर्यवेक्षकको बैठकमा प्रतिवेदन लिई केन्द्रीय कार्यालयमा आउन निर्देशन दिएको छ ।
अधिवेशनमा कहाँ के भयो ?
केन्द्रदेखि वडासम्म अध्यक्ष मण्डलले पार्टी चलाइरहेको राजपामा एकल नेतृत्वमा जाने गरी तदर्थ समिति गठनका लागि तल्लो तहमा अधिवेशन भइरहेका छन् । तर, पार्टीको वर्चश्व भएका मधेसका जिल्लामै समिति गठनमा विवाद देखिएको छ । दुई जिल्लामा विवादका कारण जिल्ला समिति नै दुई–दुईवटा बनेका छन् । मधेसका बाँकी सात जिल्लामा जिल्ला अधिवेशन हुन सकेको छैन । वडा अधिवेशन भने प्रायः जिल्लामा सकिएको छ । ‘तल्ला समितिमा अधिवेशन भइरहेको छ, केही स्थानमा बाँकी छ,’ अध्यक्ष मण्डलका सदस्य राजेन्द्र महतोले नयाँ पत्रिकासँग भने, ‘कहाँ कति भयो भन्ने रिपोर्ट आइपुगेको छैन । जिल्ला तहबाट केन्द्रमा आउँदै छ ।’
केन्द्रीय कार्यालय स्रोतले महोत्तरीमा अधिवेशनै सुरु नभएको जानकारी दियो । त्यहाँ एउटा गाउँपालिका र तीन वडाध्यक्षका लागि १४ मंसिरमा उपनिर्वाचन हुने भएकाले नेता–कार्यकर्ता त्यतै सक्रिय छन् । सुनसरी, सप्तरी, सिरहा, धनुषा, सर्लाही, रौतहटमा जिल्ला तदर्थ समिति बनिसकेका छैनन् । प्रायःमा वडा समिति बनिसकेका छन् । पालिका समिति गठनमा विवाद भइरहेका छन् ।
बारा र पर्सामा दुई समिति
राजपाको वर्चश्व रहेको बारा र पर्सामा दुईवटा जिल्ला समिति बनेका छन् । बारामा नवलकिशोर सिंह र धर्मेन्द्र यादवको नेतृत्वमा छुट्टाछुट्टै समिति बनेका हुन् । पर्सामा राजेशमान सिंह र जगदीश पटेलले छुट्टाछुट्टै समिति बनाएका छन् । उनीहरू सबै यसअघिको अध्यक्षमण्डलका सदस्य रहेका थिए ।
२२ जिल्लामा एकल नेतृत्वमा जिल्ला समिति
राजपाले २२ जिल्लामा भने एकल नेतृत्वमा जिल्ला तदर्थ समिति बनाइसकेको छ । झापा, मोरङ, धनकुटा, ताप्लेजुङ, पाँचथर, संखुवासभा, उदयपुर, कपिलवस्तु, स्याङ्जा, प्युठान, अर्घाखाँची, सल्यान, जुम्ला, सुर्खेत, दैलेख, कालिकोट, दाङ, काठमाडौं, ललितपुर, नुवाकोट सिन्धुपाल्चोक र काभ्रेमा जिल्ला तदर्थ समिति बनिसकेका केन्द्रीय कार्यालयले जानकारी दियो ।
महतो फेरि अध्यक्ष मण्डल संयोजक
राजपाको अध्यक्ष मण्डलको संयोजकमा पुनः राजेन्द्र महतो आएका छन् । बुधबारको अध्यक्ष मण्डल बैठकले बिहीबारबाटै लागू हुने गरी संयोजक महतोलाई बनाउने निर्णय गरेको संयोजक महन्थ ठाकुरद्वारा जारी विज्ञप्तिमा उल्लेख छ ।