गुल्मीको रुरु क्षेत्र गाउँपालिका ६ को रिक्त वडाध्यक्ष पदका लागि बुधबार मुख्य निर्वाचन अधिकृतको कार्यालयमा तीन जनाले उमेदवारी दर्ता गराएका छन् । नेकपा, कांग्रेस र एक स्वतन्त्र उम्मेदवारले मनोनयन दर्ता गराएका हुन् । सो वडामा एमालेबाट निर्वाचित अध्यक्ष पूर्ण बहादुर रेग्मीको निधन भएकाले उपनिर्वाचन हुन लागेको हो ।
सत्तारुढ नेकपाका तर्फबाट गिरी प्रसाद सिन्जाली र कांग्रेसबाट बेदप्रसाद दर्लामीले उम्मेदवारी दर्ता गराएका हुन् । मन बहादुर दर्लामीले भने स्वतन्त्र उमेदवारी दर्ता गरेका छन् । नेकपाले वडाध्यक्षमा उमेदवार बनाएका सिन्जाली वडा सदस्य हुन् । कांग्रेसले भने वडाध्यक्षमा पराजित दर्लामीलाई नै पुनः उमेदवार बनाएको हो ।
रुरु गाउँपालिका-६ मा कुल मतदाता सख्या २ हजार ४८ रहेको मुख्य निर्वाचन अधिकृत कृष्ण प्रसाद पौडेलले जानकारी दिए । मुख्य निर्वाचन अधिकृत पौडेलका अनुसार १ मंसिरमा उमेदवारलाई निर्वाचन चिन्ह प्रदान गर्ने कार्यक्रम रहेको छ ।