साग आउन अब १९ दिन मात्र बाँकी छ । भव्य रूपमा उद्घाटन हुने दशरथ रंगशाला निर्माणाधीन छ । हिटिङ स्विमिङ पुलको काम पनि भइरहेको छ । उद्घाटनस्थल र सर्वाधिक धेरै पदक संख्या भएको स्विमिङ पुलको निर्माणको संशय अझै बाँकी छ । तर, सदस्यसचिवको भनाइ मान्ने हो भने हिटिङ स्विमिङ पुल अबको एकसातामा पौडीका लागि योग्य हुन्छ । त्यस्तै, दशरथ रंगशाला पनि ५ मंसिरभित्र पूर्ण रूपमा तयार हुन्छ । तर, उनका दाबीहरू पटक–पटक असफल भइसकेका छन् । यसपटक पनि निर्माणाधीन अवस्थालाई हेर्दा उनले भनेको समयमा काम पूरा हुन गाह्रो छ ।

मंगलबार सागलाई लक्षित गर्दै खेलकुद पत्रकारको स्तरवृद्धिका लागि राष्ट्रिय खेलकुद परिषद्को सहयोग तथा नेपाल खेलकुद पत्रकार मञ्चको आयोजनामा दुई दिने कार्यशाला सुरु भएको छ । सोही कार्यक्रमका दौरान खेलकुदमन्त्री जगतबहादुर विश्वकर्मा र राखेप सदस्यसचिव रमेश सिलवालले पत्रकारलाई सकारात्मक समाचार सम्प्रेषण गर्न औपचारिक आग्रह गरे । देशभरबाट एक सय ४० को संख्यामा उपस्थित खेलकुद पत्रकारमाझ मन्त्री र सदस्यसचिवको अपेक्षा फरक रह्यो । उनीहरूको एउटै आग्रह थियो– जसरी भए पनि साग हुन्छ । त्यसैले सागको संरचना जस्तो भए पनि यसको भव्यताको मात्रै प्रचार होस् र पत्रकारहरूले देशको गौरवलाई ख्याल गरिदिऊन् । 

बुँदागत रूपमै असन्तुष्टि
मन्त्री विश्वकर्माले आफ्नो खटाइको कम मूल्यांकन भएको गुनासो पोखे । उनले बुँदागत रूपमै पत्रकारहरूसमक्ष आफ्ना असन्तुष्टि पोखेका थिए । उनले भने, ‘सागका लागि आफ्नो पदीय मर्यादा बिर्सिएर आफैँ रंगशालामा खटिएको छु । जसरी भए पनि समयमा काम हुनुपर्‍यो भनेर लागेको छु । तर, यहाँ सकारात्मक चर्चाभन्दा नकारात्मक चर्चाहरू बढी भइरहेका छन् ।’ उनले २०७२ मै नेपाललाई सागको जिम्मेवारी दिएको र अघिल्ला सरकारहरूले काम नगर्दा अहिले दबाब परेको दाबी गरे । मन्त्री विश्वकर्माले भने, ‘०७२ सालमै नेपाललाई दुई वर्षपछि साग हुने भनेर जिम्मेवारी दिइएको थियो । तर, अघिल्ला सरकारहरूले निरन्तर साग सारिरहे, संरचना निर्माणमा जोड दिएनन् । तर, यसपटक हामीले जोखिम मोलेर मिति नसारी कामलाई रातदिन गरेर अघि बढाइरहेका छौँ ।’

यद्यपि, उनकै कार्यकालमा पनि एकपटक साग सरिसकेको छ । सागका लागि भौतिक पूर्वाधार निर्माणमा पछिल्लो एक महिना निकै जोडतोडले लागिए पनि अझै संरचनाहरू पूरा हुन सकेका छैनन् । मन्त्री विश्वकर्माले आफूहरूले गरेको काम हतारमा भएको भनेर हुने आलोचनाले दुःख लाग्ने गरेको बताए । उनले भने, ‘अन्तिम समयमा धमाधम काम हुँदै भनेर लेख्ने र भन्ने गरिन्छ । तर, हाम्रा लागि छोटो समय थियो । यो समयमा पनि काम रातदिन गरेर हुनु सकारात्मक होइन र ?’

अहिलेसम्मकै सफल आयोजना
वर्कसपमा सदस्यसचिव सिलवाललाई सागका बारेमा भएको प्रगति तथा भइरहेका र गर्न बाँकी कामहरू, चुनौती र सागलाई भव्य बनाउने योजनाहरूका बारेमा बोल्ने जिम्मेवारी दिएको थियो । उनले यी विषयमा थोरै बोल्दै आफ्नो असन्तुष्टि पोख्ने थलोको रूपमै वर्कसपलाई प्रयोग गरे । सदस्यसचिवले सागका लागि भएका निर्णय केही जानकारी गराएपछि पत्रकारहरूसमक्ष असन्तुष्टि राख्दै भने, ‘मैले फरक–फरक खालका पत्रकारहरूको संगत गर्ने मौका पाएको छु । जसमा खेलकुद समाचारमै केन्द्रित हुने र खेलकुदको विकास चाहने पत्रकारको संख्या निकै कम छ ।’ उनले सागका लागि महत्वपूर्ण कामहरू सम्पन्न भइसकेको र भौतिक पूर्वाधार अबको दुई साताभित्र पूरा हुने बताए । सिलवालले भने, ‘दशरथ रंगशाला ५ मंसिरसम्ममा तयार हुन्छ । हिटिङ स्विमिङ पुल पनि एक साताभित्र खेल्नका लागि योग्य हुन्छ । पोखरा रंगशाला पनि १० मंसिरभित्र खेल्न योग्य हुने जानकारी मलाई आएको छ ।’

सिलवालले साग ब्रोडकास्टका लागि ठूलो सम्झौताको तयारी भइरहेको दाबी गरे । उनले उद्घाटनमा १५ हजारको उपस्थिति रहने बताए । साथै, सागको सुरक्षाका लागि २० हजार सुरक्षाकर्मी परिचालित हुने जानकारी दिए । ‘हामीले सबै काम प्लानअनुसारै गरिरहेका छौँ । त्यसैले साग समयमा हुन्न कि भन्ने प्रश्नको अन्त्य भएको छ । र, बाँकी काम पनि बिस्तारै सम्पन्न हुँदै जान्छन्,’ सिलवालले भने ।