प्रदेश सभा सदस्यका लागि नेकपाका नेता शेरमान घर्तीकाे बागी उमेदवारी फिर्ता गराउने अन्तिम प्रयास असफल भएको छ । उमेदवारी फिर्ता गराउन उनलाई हेलिकप्टर चार्टर गरी आइतबार सदरमुकाम लगे पनि समय सकिएकाले हुन सकेन । बागी उमेदवारी फिर्ता गर्न नेकपाका नेताहरूले दबाव दिएपछि उनी तयार भएका थिए । उमेदवारी फिर्ताको समय दिउँसो १ बजेसम्म थियो तर घर्ती दिउँसो करिब साढे १ बजे पुगेका थिए ।
उमेदवारी फिर्ता हुन नसकेपछि पार्टीभित्र आन्तरिक छलफल सुरू भएकाे छ । अबकाे विकल्पमा विज्ञप्ति जारी गरेर घर्तीले सार्वजनिक रूपमा उमेदवारी फिर्ता गर्नु पर्ने जिल्लाका नेकपा नेता बताउँछन् ।
आगामी १४ मंसिरमा हुने निर्वाचनका आइतबार बागलुङ-२ 'ख' मा कसैले उमेदवारी फिर्ता नलिएकाे निर्वाचन कार्यालयले जनाएकाे छ । उपनिर्वाचनका लागि १० जनाले उमेदवारी दर्ता गराएका थिए । दिउँसो १ बजेसम्म उमेदवारी फिर्ताको समय भित्र कसैले फिर्ता नलिएकाे मुख्य निर्वाचन अधिकृत बासुदेव न्यौपानले जानकारी दिए ।