जापान सरकारले सम्राट् नारुहितोको शुभराज्याभिषेक समारोह स्थगित गर्न लागेको जापानको सरकारी टेलिभिजन एनएचकेले जनाएको छ । हागिबिस नामक आँधीका कारण निर्धारित मितिमा शुभराज्याभिषेक हुन कठिन भएको सरकारी अधिकारीको भनाइ उद्धृत गर्दै सो टेलिभिजनले जनाएको छ ।
आँधीका कारण ८० जनाभन्दा बढीको मृत्यु भएको छ भने अन्य केही अझै बेपत्ता छन् । सरकारले खोज तथा उद्धार कार्य जारी राखेको छ । जापान सरकारले यही अक्टोबर २२ मा शुभराज्याभिषेकको मिति तय गरेको थियो । राज्याभिषेकका अवसरमा विदेशी विशिष्ट पाहुनालाई आमन्त्रण गरिएको छ ।
एनएचकेका अनुसार अहिले सरकारको मुख्य प्राथमिकता नै राहत र उद्धारमा केन्द्रित रहेकाले अक्टोबर २२ को कार्यक्रम स्थगित गर्न सरकारले तयारी गरिरहेको छ । जापानी सम्राट् अकिहितोले राजगद्दी परित्याग गरेपछि छोरा नारुहितोलाई गत वर्ष जापानी सम्राट् घोषणा गरिएको थियो ।