खार्पुनाथ गाउँपालिकामा एक महिनादेखि टेलिफोन सेवा अवरुद्ध भएको छ । जसले गर्दा एक हजारभन्दा बढी परिवार सञ्चारसेवाबाट वञ्चित भएका छन् । खार्पुनाथ गाउँपालिका–३ स्थित रायाको ठानाकोटमा रहेको नेपाल टेलिकमको टावर बिग्रिएपछि सञ्चारसेवा अवरुद्ध भएको हो । जसले गर्दा यहाँका ६ गाउँका एक हजारभन्दा बढी परिवार प्रभावित भएको स्थानीय लालगिरी रावलले बताए । टेलिकमका प्राविधिक आएर बनाउँदा केही दिन चले पनि फेरि बिग्रिने गेको उनले बताए ।
गाउँबाट टाढा रहेका आफन्तसँग सम्पर्क हुन नसकेको स्थानीय शिव रावलले गुनासो गरे । ‘एक महिना भयो, आफन्तजनसँग कुराकानी गर्न सकिएको छैन । कतिपय काम गर्न हिँडेर अर्को गाउँ जानुपर्छ,’ रावलले भने । यससम्बन्धी नेपाल टेलिकमलाई जानकारी गराएको भए पनि मर्मतसम्भार नगरेको उनको भनाइ छ ।