२४ विद्यालय पुनर्निर्माण गर्न त्रिपक्षीय समझदारीमा हस्ताक्षर
राष्ट्रिय पुनर्निर्माण प्राधिकरण, नेपालस्थित नर्वेली राजदूतावास र युनाइटेड नेसन्स अफिस फर प्रोजेक्ट सर्भिसेस (युएनओपिएस)बीच २४ वटा विद्यालय पुनर्निर्माणका लागि समझदारीपत्रमा हस्ताक्षर भएको छ । नर्वे सरकारको करिब ८० लाख अमेरिकी डलर सहयोगमा सिन्धुली, रामेछाप, भक्तपुर र काठमाडौंमा विद्यालय बन्नेछन् ।
समझदारीपत्रमा प्राधिकरणका तर्फबाट सहसचिव पीताम्बर घिमिरे, नेपालका लागि नर्वेली राजदूत लास्से योर्न जोहानेस्सेन र युएनओपिएसका कन्ट्री डाइरेक्टर चाल्र्स क्यालानानले हस्ताक्षर गरेका हुन् ।
परियोजनाअन्तर्गत रामेछापमा १३, सिन्धुलीमा नौ तथा काठमाडौं र भक्तपुरमा एक–एकवटा विद्यालय पुनर्निर्माण हुनेछन् । जसमा एक सय ४४ वटा कक्षाकोठा रहनेछन् । अपांगमैत्री विद्यालयमा शौचालय, खानेपानीको सुविधा हुनेछ । विद्यालय पुनर्निर्माण भएपछि करिब पाँच हजार पाँच सय विद्यार्थी लाभान्वित हुनेछन् । परियोजना १४ मंसिर ०७८ सम्ममा सकिनेछ ।