भोजपुरमा एक दर्जन खानेपानी आयोजना अलपत्र
सरकारले ग्रामीण खानेपानी तथा सरसफाइ कोष विकास समिति विघटन गरेपछि भोजपुरमा सञ्चालित एक दर्जनभन्दा बढी खानेपानी आयोजना अलपत्र परेका छन् । २० असारमा सरकारले देशैभरिका विकास समिति खारेज गर्ने निर्णय गरेको थियो ।
आमचोक गाउँपालिकाका–७ र ८ देवानटारमा सञ्चालित खरखरे खानेपानी उपभोक्ता समितिका अध्यक्ष नवीन राईले समिति खारेज भएपछि काममा समस्या भएको बताए । योजना सकिए पनि अनुगमन तथा मूल्यांकनका लागि केन्द्रले प्राविधिक टोली नपठाउँदा समस्या भएको उनको भनाइ छ । उनले भने, ‘आयोजनाको अनुगमन र मूल्यांकन गर्ने प्राविधिक आएका छैनन् । आयोजनाको कारोबार, बिल भर्पाइै क्लियर गर्न पाइएको छैन ।’
जनश्रमदानसहित झन्डै एक करोड रुपैयाँको लागतमा खरखरे खानेपानी आयोजना सञ्चालनमा आएको हो । यो योजनाबाट एक सय ८० घरपरिवार प्रत्यक्ष लाभान्वित भएका छन् । उपभोक्ता समिति आफैँले ऋण लिएर सामग्री खरिद गर्नेदेखि कामदारलाई निर्माणको काममा लगाएको थियो । समिति खारेज हुँदा कामदारलाई पारिश्रमिक वितरणमा समेत समस्या भएको राईले बताए ।
१६ आयोजना सञ्चालनमा
भोजपुरमा तीनवटा सहयोगी संस्थामार्फत १६ वटा खानेपानी आयोजना सञ्चालनमा छन् । हतुवागढी गाउँपालिका–१० हसनपुरस्थित सापेनटार खानेपानी आयोजनाको पनि अन्तिम किस्ता रकम भुक्तानी हुन बाँकी छ । आयोजनाका अध्यक्ष प्रसाद राईले केन्द्रले रकम नपठाउँदा आयोजना पूरा हुन नसकेको बताए ।
आयोजनाको सहयोगी संस्था हिहल्र्ड नेपाल भोजपुरका खानेपानी तथा सरसफाइ अधिकृत खगेन्द्र खड्काले काम सुरु भइसकेका योजना बीचमै अलपत्र पार्ने गरी सरकारले समिति खारेज गर्दा समस्या भएको बताए । समिति खारेज हुँदा ५० जना कर्मचारीले ६ महिनादेखि तलबसमेत खान नपाएको गैरसरकारी संस्था महासंघ भोजपुरका अध्यक्ष बलराम राईले बताए ।
फन्ड बोर्डका सूचना अधिकारी टीकाप्रसाद अधिकारीले समिति विघटनसँगै तत्कालका लागि खानेपानी र सरसफाइमा छुट्याइएको दुई अर्ब रुपैयाँ के हुने भनेर अन्योल सिर्जना भएको बताए ।