अनियमित रूपमा खोलाको दोहन हुँदा स्थानीय तहका जनप्रतिनिधि मुकदर्शक, गिट्टी बालुवा उत्खननमा जनप्रतिनिधिकै संलग्नताको आशंका
सन्धिखर्क नगरपालिका क्षेत्रका खोलामा अनियमित ढंगले गिट्टी, बालुवा उत्खनन् भइरहेको छ । वर्षातकाे वेला खोला र नदी उत्खनन् गर्न नपाइने भए पनि सन्धिखर्क नगरपालिकामा भने निरन्तर खाेला दोहन चलिरहेको छ ।
अनियमित रूपमा खोलाको दोहन हुँदा पनि स्थानीय तहका जनप्रतिनिधि भने मुकदर्शक बनेका छन् । गिट्टी बालुवा उत्खननमा जनप्रतिनिधिकै संलग्नताको आशंका स्थानीयले गरेका छन् ।
स्थानीय बाँगी खोलामा ठेकेदारले स्याउला, बाँसले खोला थुनेर बालुवा जम्मा गर्ने गरेका छन् । स्थानीय श्रमिकलाई बालुवा संकलन गर्न लगाएबापत एक ट्याक्टर बालुवाको १२ देखि १५ सय रुपैयाँ दिने गरिएको छ । सन्धिखर्क नगरपालिकाका शाखा अधिकृत गोविन्द केसीले खाेला दोहन भएको विषयमा जानकारी नभएको दाबी गरे । उनले खाेलाको दोहन रोक्न प्रहरीलाई आग्रह गरिने बताए ।
अर्घाखाँचीका सहायक प्रमुख जिल्ला अधिकारी विष्णुराज बेलबासेले अनियमितरूपमा खाेला दोहन रोक्न स्थानीय तह नै सक्रिय हुनुपर्ने बताए । उनले सन्धिखर्क नगरपालिकालाई खाेला दोहन रोक्न निर्देशन गरिएको बताए ।