गत महिना बाढीले धानको बेर्ना (ब्याड) गलायो । बाढी रोकिएपछि किसानले धान रोप्ने जोखिम मोले । धान त जसोतसो रोपियो, तर अहिले खेतमा पानी नहुँदा किसान चिन्तित भएका छन् ।
पानी पर्ने आस गर्दैै किसानहरू दैनिकजसो आकाशतिर हेर्छन् । तर, पानीको छाँटकाँट नदेखिँदा उनीहरू पुनः उदास हुन्छन् । पानी नपरेकाले खेत चिरा–चिरा परेका छन् । हरियो धान पहेँलो हुनै लाग्यो । तर, पानीको कुनै सुरसारै छैन ।
जलेश्वर नगरपालिका–५ का किसान रामजतन कापरले भने, आकाशे पानीकै भरमा धानखेती लगाइयो । तर, मौसमले समेत साथ दिएन । घरि आफ्नो खेत त घरि आकाश देखेर विरक्त लाग्छ ।’
कहिले बाढी त कहिले सुक्खा ! महोत्तरीका किसान आफूहरूलाई कुनै मौसम वा महिनामा पनि चयन नभएको बताउँछन् । सरकारको लगानी बालुवामा पानीबाहेक केही नरहेको किसानहरूको दुःखेसो छ ।