मुख्य समाचार

पशुपतिनाथको आरतिअघि राष्ट्रिय गान बजाउने निर्णयमा विचार गर्न कांग्रेसकाे आग्रह

कांग्रेस सांसद भिमसेनदास प्रधानले पशुपतिनाथको आरति कार्यक्रमभन्दा अगाडि नेपालको राष्ट्रिय गान बजाउनु पर्ने व्यवस्था समग्र धर्म, परम्परा तथा संस्कृतिविरुद्ध भएकाले विचार गर्न सरकारको ध्यानाकर्षण गराएका छन् । 

प्रतिनिधिसभाको बैठकमा आइतबार उनले पशुपति आर्यघाटमा आरती मात्रै नभई दाहसंस्कार गर्ने मलामी तथा किरीयापुत्रीहरु पनि हुने स्मरण गराउँदै शोकमा रहेका र दाहसंस्कारमा रहेकाहरुले राष्ट्रिय गान बज्दा सम्मानार्थ उभिन नसक्ने उल्लेख गरे । सरकारको निर्णयले निर्णयले राष्ट्रिय गानकै अनादर गरेको उनले टिप्पणी गरे । 

‘बारम्बार किन सरकारले विवादित कुरा ल्याउँछ ?,’ उनले प्रश्न गरे, ‘अहिले सरकारको साख गिरेकोमा हामीलाई चिन्ता लागेको छ । यस्तै कारणले गणतन्त्रमाथि नेपाली जनताको अनास्था प्रकट भएको छ ।’ सरकारका पछिल्ला निर्णय पञ्चायतको पुनरावृत्ती जस्तो देखिएको भन्दै उनले जहाँ पायो त्यहाँ राष्ट्रिय गान बजाउँदा सम्मान भन्दा अपमान हुने र गरिमा घट्ने तर्फ सरकारलाई सचेत गराए । 

केही दिनअघि संस्कृति पर्यटन तथा नागरिक उड्डयन मन्त्री योगेश भट्टराईले पशुपतिको आरतिअगाडि राष्ट्रिय गान बजाउनुपर्ने भन्दै सम्बन्धित निकायलाई निर्देशन दिएका थिए ।