रुकुम पश्चिमको आठबीसकोट नगरपालिका ६ मन्काबगरका ६ वटा घर ठूलीभेरी नदीले बगाएको छ । नदीले कटान गर्दा कालीबहादुर बोहरा, वीरबहादुर बोहरा, गोर्खबहादुर बोहरा, जुनबहादुर बोहरा, दीपक बोहरा र नन्दराम बोहराको घर बगेका छन् । यससँगै ठूलीभेरीले यो वर्ष मन्काबगरका नौ घर बगाइसकेको छ ।
यसअघि पत्रे बोहरा, भीमबहादुर बोहरा र विष्णुकुमारी बुढाको घर नदीले बगाएको थियो । नदीले गाउँ कटान गर्न थालेपछि ती घर खाली गरिएको थियो । जसका कारण धनजनको क्षति हुन नपाएको आठबीसकोट नगरपालिका–६ का वडाध्यक्ष डिल्लीबहादुर चनेलले जानकारी दिए ।
अझै एक दर्जनभन्दा बढी घर नदी कटानको उच्च जोखिममा रहेको उनको भनाइ छ । ती घर पनि खाली गरिसकिएको उनले बताए । घर बगेका तथा जोखिममा रहेका परिवार अहिले आफन्तको घरमा आश्रय लिएर बसिरहेका छन् । केही परिवार भने गोठमा बसिरहेका छन् ।
जाजरकोट–डोल्पा सडक निर्माणका क्रममा झरेको माटो, ढुंगा, काठलगायतले बहाब रोकेपछि नदीले धार परिवर्तन गरेको थियो । त्यसपछि बस्तीतिर कटान सुरु भएको थियो ।