२०७६ श्रावण २८ मंगलबार २०:०१:००
नयाँ पत्रिका

विश्वविद्यालयको नियुक्तिमा दलीय भागवण्डा भए आन्दोनल गर्ने डा. केसीको चेतावनी

विभिन्न विश्वविद्यालयहरुको नियुक्तिमा विगतमा जस्तै दलीय भागवण्डा भए आन्दोलन सुरु गर्न बाध्य हुने डा. गोविन्द केसीले चेतावनी दिएका छन् । 

केसीले मंगलबार विज्ञप्ती जारी गर्दै दलीय भागगण्डा तोडेर ‘विश्वविद्यालय तथा प्रतिष्ठानका पदाधिकारी नियुक्तिको मापदण्ड निर्धारण कार्यदल’ले प्रतिवेदनलाई कार्यान्वयन गर्न सरकारको ध्यानाकर्षण गराएका छन् । 
उनले सरकारद्वारा गठित न्यायिक जाँचबुझ आयोग वा समितिले दोषी ठहर गरेका व्यक्तिहरुलाई विश्वविद्यालयहरुमा नियुक्त नगर्न आग्रह गरेका छन् । त्रिवि सेवा आयोगभित्र भ्रष्टाचारको विकराल अवस्था भर्खरै सतहमा

आएकाले फेरि भावण्डाका आधारमा नियुक्ति गरिए लज्जास्पद हुने उनको भनाइ छ । 

यसैबीच चिकित्सा शिक्षा आयोगले पूर्णता नपाएको विभिन्न वहाना देखाई केही मेडिकल कलेजले विद्यार्थी भर्ना सुरु गरेको भर्ना रद्द गर्न उनले माग गरेका छन् । ऐनमा समावेश भएको  ७५ प्रतिशत छात्रावृत्ति, साझा प्रवेश परीक्षा लगायतका बुँदा कार्यन्वयन गरेर मात्र भर्ना सुरु गर्न उनले माग गरेका छन् ।