म धेरै भ्रमण गर्न मन पराउने मान्छे हुँ । त्यसैले होला, साथीहरूले मेरो नाम फिरन्ते राखिदिएका छन् । थुप्रै देशको यात्रा गरिसकेकी छु । विकासका दृष्टिकोणले त्यहाँका ठाउँ राम्रा छन् । तर, भौगोलिक हिसाबले हेर्दा नेपालजत्तिको राम्रो ठाउँ मलाई कतै लागेन । गत वर्ष दसैँपछि मार्दी हिमाल गएकी थिएँ । अन्नपूर्ण सर्किटअन्तर्गत पर्ने यो हिमाल नेपालका प्रसिद्ध ठाउँमध्ये एक हो । मैले भ्रमण गरेकामध्ये पनि अहिलेसम्मकै रमाइलो लागेको ठाउँ यही हो ।
काठमाडौंबाट हिँडेको तीन दिनमा मार्दी हिमाल पुगिन्छ । त्यो हिमाल भएको डाँडाको नाम बादलडाँडा हो । ३८०० मिटरको उचाइमा रहेको छ । त्यहाँबाट हेर्दा बादल तल जमिनमा देखिन्छ । यो दृश्यले त्यहाँ जाने जो–कोहीलाई पागल बनाउँछ । त्यहाँ पुगेपछि हृदय खोलेर खुसी हुन मन लाग्छ ।
मार्दी हिमाल पोखरा हुँदै गइन्छ । हिमाल तलको बेसीसम्म गाडीमै जान सकिन्छ, त्यसपछि पैदल यात्रा सुरु हुन्छ । मेरो यो पहिलो ट्रेकिङ थियो । त्यसैले, त्यो ठाउँ अहिले सम्झिँदा पनि गइहालूँजस्तो लाग्छ । हामी सातजनाको ग्रुपमा गएका थियौँ । रमाइलो भयो । अब फेरि धेरै साथी बनाएर जाने प्लानमा छु । स्वास्थ्य समस्या हुने र हिँड्न नसक्नेलाई भने त्यहाँ जान अलि गाह्रो हुन्छ ।