राष्ट्रपति डोनाल्ड ट्रम्पसँग विवाद भएपछि अमेरिकाका लागि बेलायती राजदूत किम ड्यारोकले राजीनामा दिएका छन् । अमेरिकी राष्ट्रपति ट्रम्पलाई ‘अयोग्य र असफल’ भएको टिप्पणी गरेको सार्वजनिक भएपछि ट्रम्प र किमबीच विवाद शुरु भएको थियो ।
बेलायती विदेश मन्त्रालयका अधिकारीलाई बुझाएको राजीनामापत्रमा किमले ट्रम्पसँगको सम्बन्ध सुधार्न ‘असम्भव’ देखेर राजीनामा दिनुपरेको उल्लेख गरेका छन् । उनले सम्बन्ध सुधार र बेलायती चासोका बारेमा बुझाउन पटकपटक प्रयास गरे पनि सफल हुन नसकेको राजीनामापत्रमा उल्लेख गरेका छन् ।
‘राम्रोसँग भूमिका निर्वाह गर्न असम्भव देखेर जिम्मेबारी त्याग्ने निर्णय गरेको छु,’ उनले भनेका छन् ।
उनको राजीनामाका बारे प्रधानमन्त्री थेरेसा मेले संसद्मा जानकारी गराएकी छिन् । राजदूत किमले विगतमा राम्रो जिम्मेवारी निर्वाह गरेको भन्दै उनले धन्यवाद दिइन् । किमले ट्रम्पको आलोचना गरेको इमेल केही दिन अगाडि सार्वजनिक भएको थियो । इमेल सार्वजनिक भएसँगै ट्रम्पले पनि राजदूत किमको आलोचना गरेका थिए ।