एमबिबिएस अध्ययनरत विद्याार्थीले छुरा हान्दा तीन घाइते
वीरगन्जको नेशनल मेडिकल कलेजमा अध्ययनरत विद्यार्थीबीच शुक्रबार विवादमा छुरा प्रहार हुँदा तीन जना घाइते भएका छन् ।
एमबीबिएस अध्ययनरत सर्लाहीका रन्जितप्रसाद रौनीयार र रौतहटका अरविन्द सहनीबीच विवादका क्रममा छुरा हानाहान भएको हो । अरविन्दले छुरा हान्दा रन्जित, उनकी आमा मीनादेवी र बहिनी चाँदनी घाइते भएका छन् । वीरगन्जको भिस्वस्थित एउटै घरमा डेरा लिएर बसेका उनीहरुबीच विवाद हुँदा अरविन्दले छुरा हानेको प्रहरीले जनाएको छ ।
प्रहरी नायव उपरीक्षक अनन्तराम शर्माले छुरा प्रहारबाट घाइते मिना र चाँदनीको अवस्था सामान्य रहेको बताए । गम्भीर घाइते रन्जितको नेशनल मेडिकल कलेजमै उपचार भइरहेको छ । छुरा प्रहार गर्ने अरविन्द भने फरार छन् । उनको खोजी भइरहेको शर्माले बताए ।