युक्रेनमा रुसी ड्रोन आक्रमण, एकजनाको मृत्यु

युक्रेनको ओडेसा सहरमा शुक्रबार राति भएको रुसी ड्रोन आक्रमणमा एकजनाको ज्यान गएको र अन्य केही घाइते भएको युक्रेनी अधिकारीहरूले जनाएका छन्। 

ओडेसाका मेयर गेन्नाडी ट्रुखानोभका अनुसार २० भन्दा बढी ड्रोन विभिन्न दिशाबाट सहरमा प्रवेश गरेका थिए, जसका कारण केही नागरिक संरचनामा क्षति पुगेको र एउटा आवासीय भवनमा आगलागीसमेत भएको बताइएको छ।

स्थानीय आपतकालीन सेवाले उद्धारकार्यको क्रममा पाँचजनालाई जलेको भवनबाट सुरक्षित निकालिएको भए पनि तीमध्ये एक महिलाको निधन भएको पुष्टि गरिएको छ। ऐतिहासिक र सांस्कृतिक दृष्टिले महत्त्वपूर्ण ओडेसा सहर हाल युनेस्कोको विश्व सम्पदा सूचीमा सूचीकृत रहेको र पछिल्ला समयमा बारम्बार आक्रमणको शिकार हुँदै आएको उल्लेखनीय छ।

उता, रुसी रक्षा मन्त्रालयले आफ्नो बयानमा शुक्रबार साँझको पाँच घण्टाको अवधिमा ८७ युक्रेनी ड्रोन ध्वस्त पारिएको जानकारी दिएको छ, जसमा ब्रियान्स्क र मस्को क्षेत्रहरू पनि समावेश छन्। पछिल्ला केही हप्तामा युक्रेनभर रुसी आक्रमणहरू पुनः तीव्र हुँदै गएका छन्, जसका कारण सर्वसाधारण जनतामा चिन्ता बढिरहेको देखिन्छ। 

अमेरिकी राष्ट्रपति डोनाल्ड ट्रम्पले पनि शान्ति वार्तातर्फ अगाडि नबढिएमा रुसमाथि थप कडा प्रतिबन्ध लगाउने चेतावनी दिएका छन्। यसैबिच, युरोपेली संघ र बेलायतले पनि संयुक्त रूपमा रुसी तेल निर्यातमा मूल्य सीमा घटाउने निर्णय लिँदै युद्ध अन्त्यका लागि आर्थिक दबाब सिर्जना गर्ने प्रयास गरेका छन्।